BENİLÜKS AZƏRBAYCANLILARI KONQRESİNİN I I QURULTAYI KEÇİRİLƏCƏK
Bakı, 6 mart (AZƏRTAC). Martın 7-də Niderland Krallığının paytaxtı Amsterdamda Benilüks Azərbaycanlıları Konqresinin (BAK) ikinci qurultayı keçiriləcəkdir.
Diaspor ilə İş üzrə Dövlət Komitəsindən bildirmişlər ki, Konqresin nizamnaməsinə əsasən, iki ildən bir keçirilməsi nəzərdə tutulmuş qurultayda idarə heyətinin və konqresin nəzdində fəaliyyət göstərən komissiyaların hesabatı dinləniləcək, idarə heyətinin yeni tərkibi seçiləcək və qarşıda duran vəzifələr müəyyənləşdiriləcəkdir.
Qurultayda Beniluks ölkələrindəki Azərbaycan və türk diaspor təşkilatlarının rəhbərləri, Avropadakı Azərbaycan diasporunun tanınmış təmsilçiləri, diplomatik korpusun, yerli siyasi partiyaların nümayəndələri, eləcə də Dövlət Komitəsinin əməkdaşları iştirak edəcəklər.
Xatırladaq ki, BAK 2006-cı il noyabrın 18-də Amsterdamda yaradılmışdır. Burada Azərbaycan diaspor təşkilatları və beş təşkilatı özündə birləşdirən İraq Türkmənləri Məclisi toplaşmışdır. Konqresin yaradılmasının məqsədi Benilüks ölkələrində fəaliyyət göstərən cəmiyyət və dərnəkləri bir araya gətirmək, onların əlaqələrinin uzlaşdırılmaq, Azərbaycan və türkdilli icmaların regionda fəaliyyətlərinin əlaqələndirməkdir.
Benilüks ölkələrində 40 minə yaxın azərbaycanlı, 500 minə yaxın isə türk yaşadığı bildirilir. Benilüks ölkələri arasında ən çox azərbaycanlı isə Niderlandda yaşayır. Onların diaspor kimi təşkilatlanması əsasən 1990-ci illərin sonu 2000-ci illərin əvvəllərinə təsadüf edir. Benilüks ölkələrinin müxtəlif şəhərlərində 30-a yaxın Azərbaycan diaspor təşkilatı fəaliyyət göstərir.
Dövlət Komitəsindən onu da bildirmişlər ki, BAK-ın gördüyü işlər çoxşaxəlidir. BAK, həmçinin fəaliyyətini daha da gücləndirmək məqsədi ilə diaspor təşkilatlarımız arasında ilk olaraq Azərbaycan Milli Məclisində fəaliyyət göstərən Azərbaycan-Hollandiya, Azərbaycan-Belçika, Azərbaycan-Lüksemburq parlamentlərarası işçi qrupları ilə birlikdə fəaliyyət göstərmək haqda rəsmi razılığa gəlmişdir. Bu razılaşma nəticəsində Milli Məclisin hər üç qrupda təmsil olunan 17 deputatı ilə Benilüks ölkələri parlament üzvləri arasında sıx əlaqələrin qurulması, dövlətimizin mənafeyini təmin edə biləcək məqamlarda Azərbaycan diasporunun dəstəklənməsi istiqamətində işlər aparılır.
2007-ci ilin sentyabrından BAK Amsterdam şəhərində Heydər Əliyev Fondunun və Azərbaycanın Hollandiyadakı səfiri Fuad İsgəndərovun köməyi ilə bazar günləri fəaliyyət göstərən Azərbaycan dili məktəbi açmışdır. Ötən il isə Rotterdamda ikinci həftəsonu məktəbi fəaliyyətə başlamışdır. Bu məktəblərdə azərbaycanlı uşaqlarla yanaşı, İraq türkmənlərinin uşaqları da təhsil alırlar.
Bundan başqa, Konqresin Rotterdam şöbəsi azərbaycanlı və türk gənclərin pulsuz kikboksinq, eləcə də digər idman növləri ilə məşğul olmaları üçün bu şəhərdə ən müasir qurğularla təchiz olunmuş idman zalı açmışdır.
Azərbaycan idmançılarını Avropa idman meydanlarında dəstəkləmək məqsədi ilə BAK-da təmsil olunan gənclər Azərbaycan İdmanının “Fan Klubu”nu yaratmışlar. Klubun yüzlərlə üzvü Qərbi və Şərqi Avropada keçirilən mötəbər idman yarışlarında idmançılarımızı dəstəkləmək üçün Azərbaycan bayraqları və şüarlarla həmin ölkələrə gedir və onlara mənəvi dəstək olurlar.
Bölmənin digər xəbərləri
