Berlində 15 xəstəni öldürməkdə təqsirləndirilən palliativ xidmət həkimi ilə bağlı məhkəmə prosesi başlayıb
Berlin, 14 iyul, AZƏRTAC
Berlində 15 ağır xəstəni qəsdən öldürməkdə şübhəli bilinən palliativ tibb mütəxəssisi ilə bağlı məhkəmə prosesi başlayıb.
AZƏRTAC yerli mediaya istinadla xəbər verir ki, 40 yaşlı həkim 2021-ci ilin sentyabrından 2024-cü ilin iyulunadək olan dövrdə 14 nəfəri evə başçəkmələr zamanı, bir nəfəri isə xüsusi tibb müəssisəsində öldürməkdə ittiham olunur. İttihama əsasən o, ağır xəstələri evlərində ziyarət edərkən onların razılığı və xəbərdarlığı olmadan həmin şəxslərə ölümcül preparatlar verib. Ölənlərin ən gənci 25 yaşlı xərçəng xəstəsi qadın, ən yaşlısı isə 87 yaşlı pasiyent olub. Həkimin beş hadisə zamanı qətllərdən sonra cinayətin izlərini itirmək üçün mənzillərdə yanğınlar törətdiyi bildirilir.
Həkim həmkarlarından birinin onun yüksək dozalı dərmanlardan qeyri-adi şəkildə istifadə etməsi ilə bağlı polisə məlumat verməsindən sonra 2024-cü ilin avqustunda saxlanılıb.
Prokurorluğun açıqlamasına görə, istintaq zamanı ümumilikdə 395 ölüm hadisəsi müəyyən edilib və onlar hələ də təhlil olunur. Proses çərçivəsində 15 məzarın ekshumasiyası həyata keçirilib.
Məhkəmə prosesi çərçivəsində 30 iclas günü nəzərdə tutulur və prosesin 2026-cı ilin yanvarına qədər davam etməsi gözlənilir. Təqsirləndirilən şəxs susmaq hüququndan istifadə edir.
Berıin
Bölmənin digər xəbərləri
