“Bəxtiyar Vahabzadə və Türk dünyası” - elmi sessiya
Bakı, 3 oktyabr, AZƏRTAC
Oktyabrın 3-də AMEA-nın akademik Ziya Bünyadov adına Şərqşünaslıq İnstitutunda “Bəxtiyar Vahabzadə və Türk dünyası” mövzusunda elmi sessiya keçirilib.
İnstitutdan AZƏRTAC-a bildirilib ki, AMEA-nın vitse-prezidenti, Şərqşünaslıq İnstitutunun direktoru akademik Gövhər Baxşəliyeva bu il görkəmli Azərbaycan şairi Bəxtiyar Vahabzadənin anadan olmasının 100 illiyinin qeyd edildiyini söyləyərək, Prezident İlham Əliyevin bununla bağlı 2025-ci il fevralın 21-də Sərəncam imzaladığını xatırladıb.
Akademik G.Baxşəliyeva Bəxtiyar Vahabzadənin Azərbaycanda milli ruhun formalaşmasında müstəsna rol oynamış şair olduğunu deyərək, onun daim öz bədii yaradıcılığında və çıxışlarında milli məsələləri, ana dili məsələsini qaldırdığını qeyd edib.
Şairin “Gülüstan” poemasının xalqın harayı olduğunu deyən G.Baxşəliyeva bu mövzunun onun yaradıcılığında mühüm yer tutduğunu söyləyib. Azadlıq carçısı Bəxtiyar Vahabzadənin 20 Yanvar şəhidlərinin dəfni zamanı səsini ucaltdığını deyən akademik onun “Şəhidlər” poemasının xalqın səsi olduğunu vurğulayıb.
İnstitutun Türk filologiyası şöbəsinin müdiri filologiya üzrə fəlsəfə doktoru, dosent Səriyyə Gündoğdu elmi sessiyada “Bir millətin haqq səsi - istiqlal şairi Bəxtiyar Vahabzadə” mövzusunda məruzə edib. O, XX əsrin ikinci yarısında cərəyan edən hadisələrdə Bəxtiyar Vahabzadənin xalqın düşüncəsi, mənəviyyatı, gələcəyi və istiqlalı üçün bütün varlığıyla mübarizə apardığını, öz istedadı ilə böyük bir nəslin yetişməsində mühüm rol oynadığını qeyd edib. “Gülüstan” poeması ilə B.Vahabzadənin ədəbiyyat tarixi ilə yanaşı ictimai fikir tarixinə də daxil olduğunu deyən məruzəçi bu əsərin Azərbaycan xalqına istiqlaliyyətinin, milli-mənəvi dəyərlərinin unutdurmaq istənildiyi bir dövrdə yazılması ilə çox önəmli olduğunu bildirib.
Şərqşünaslıq İnstitutunun Şərq-Qərb şöbəsinin müdiri dosent Məmmədəli Babaşlı “Bəxtiyar Vahabzadə yaradıcılığında milli təəssübkeşlik və istiqlal motivləri” mövzusunda məruzə edib. Bəxtiyar Vahabzadənin yalnız poetik istedadı ilə deyil, həm də dərin vətəndaşlıq mövqeyi, milli düşüncəsi və mənəvi dəyərlərə bağlılığı ilə ədəbi irsimizdə xüsusi yer tutduğunu deyən məruzəçi onun poeziyasını milli kimliyimizin, tariximizin, ana dilimizin, Vətən sevgisinin və mənəvi dəyərlərimizin güzgüsü olduğunu bildirib. Ötən əsrin 50-ci illərindən başlayaraq milli düşüncə tərzinin təbliğatçısı kimi yazıb-yaratmağa başlayan şairin bir çox əsərlərinin zamanı qabaqladığını deyən M.Babaşlı onun yaradıcılığında milli təəssübkeşlik və istiqlal motivlərinin necə əks olunmasından bəhs edib.
İnstitutun İran filologiyası şöbəsinin aparıcı elmi işçisi dosent Rəna Rzayeva “Bəxtiyar Vahabzadənin yaradıcılığında Cənubi Azərbaycan mövzusu” adlı məruzə ilə çıxış edib. Məruzəçi “Cənub” mövzusunun sovet rejiminin ən kəskin dövründə belə bütün təzyiqlərə baxmayaraq, Bəxtiyar Vahabzadə yaradıcılığında mühüm yer tutduğunu söyləyib. Bu mövzunu əhatə edən və Bəxtiyar Vahabzadənin 100 illiyinə həsr olunmuş “Vətəndən Vətənə məktublar...” kitabının tərtibçisi və ön sözünün müəllifi olan R.Rzayeva bu kitabın yaxın günlərdə işıq üzü görəcəyini qeyd edib.
Sonda məruzələr ətrafında müzakirələr aparılıb və suallar cavablandırılıb.
Bölmənin digər xəbərləri
