Brüssel, 19 iyul, AZƏRTAC

Almaniyanın nüfuzlu “Bild” xəbər nəşrində Avropa Komissiyasının prezidenti Ursula fon der Lyayenin Bakıya səfəri və Azərbaycan Prezidenti İlham Əliyev ilə birlikdə energetika sahəsində strateji tərəfdaşlığa dair Anlaşma Memorandumunun imzalanması barədə məqalə dərc edilib.

AZƏRTAC xəbər verir ki, “Azərbaycana qaz şop-turu” sərlövhəli materialda Avropa İttifaqının yaxın illərdə Azərbaycan Respublikasından qaz idxalını ikiqat artırmaq niyyətində olmasından bəhs edilir. Bu göstərici hazırda ildə 8,1 milyard kubmetrə bərabər olduğu halda, 2027-ci ildə azı 20 milyard kubmetrə bərabər olacaq. Məqalədə deyilir: “Ursula Fon der Lyayenin bu məqsədlə təcili olaraq Bakıya yola düşüb. Bazar ertəsi Avropa Komissiyasının prezidenti və Azərbaycan Prezidenti İlham Əliyev müvafiq niyyət bəyannaməsini imzalayıblar.

“Bild” nəşri Ursula fon der Lyayenin KİV üçün brifinqdə dediyi sözləri sitat gətirir: “Biz Azərbaycanı energi təhlükəsizliyi, qazıntı şəklində enerji resurslarının zəmanətli təchizatı məsələlərində, eləcə də bizim iqlim baxımından neytral siyasətə keçid yolumuzda mühüm tərəfdaş hesab edirik”.

Avropa İttifaqı Ukraynada gedən müharibə fonunda özünün Rusiyadan enerji daşıyıcıları idxalından asılılığını azaltmağa çalışır. Ötən həftənin bazar ertəsi günündən başlayaraq “Şimal axını-1” Baltik qaz kəməri vasitəsilə Almaniyaya qaz daxil olmur. Moskvanın səsləndirdiyi rəsmi səbəb - kəmərdə təmir işləri aparılmasıdır. Kəməri istismar edən şirkətin sözlərinə görə bu işlər iyulun 21-dək davam etməlidir. Lakin Almaniya hökuməti ehtiyat edir ki, təmir işləri başa çatandan sonra da bu kəmər vasitəsilə qaz təchizatı bərpa olunmayacaq, bunun əvəzinə ventili bağlı vəziyyətdə saxlamaq üçün yeni bəhanələr səslənəcək.

“Bild” nəşri Avropa Komissiyasının rəhbərindən daha bir sitat gətirir: “Azərbaycan ilə saziş Rusiya qazı nəqlinin azaldılmasının kompensasiya olunmasına kömək edəcək və Avropaya qaz nəqlinin təhlükəsizliyinin təmin edilməsinə əhəmiyyətli töhfə verəcək”.

Fon der Lyayen deyib: “Rusiyadan Avropaya qaz nəqli hələ Ukraynada müharibə başlayana qədər də etibarlı deyildi. Ona görə indi Aİ daha etibarlı və etimada layiq təchizatçılara müraciət edir, onlardan biri də Azərbaycandır”.

“Bild” imzalanmış memorandumu “gələcək üçün yol xəritəsi” adlandırmış Prezident İlham Əliyevin sözlərini də sitat gətirir: “Yaxın illərdə Azərbaycanda təbii qaz hasilatı yeni mənbələrin işlənməsi hesabına hətta əhəmiyyətli dərəcədə artırıla bilər”.

Vüqar Seyidov

AZƏRTAC-ın xüsusi müxbiri

Brüssel