BMT-də tarixi çıxış: Azərbaycan yeni qlobal reallığın mərkəzində ŞƏRH
Bakı, 26 sentyabr, AZƏRTAC
Azərbaycan beynəlxalq münasibətlər sistemində mühüm və fəal iştirakçılardan biri kimi çıxış edir. Dövlətimizin apardığı uğurlu, çoxistiqamətli və tarazlaşdırılmış xarici siyasət xətti Azərbaycanın həm regional, həm də qlobal miqyasda nüfuzunun artmasına şərait yaradır. Müstəqilliyini yenidən qazandıqdan sonra Azərbaycan dünya birliyinə inteqrasiyaya böyük diqqət ayırıb, bir sıra beynəlxalq və regional təşkilatlarla məhsuldar əməkdaşlıq qurmağa nail olub.
Bu fikirləri AZƏRTAC-a açıqlamasında siyasi şərhçi Emin Bağırov bildirib.
O qeyd edib ki, Azərbaycanın Birləşmiş Millətlər Təşkilatı (BMT) ilə münasibətləri xüsusilə önəmlidir. 1992-ci ildən etibarən bu qurumun üzvü olan Azərbaycan, təşkilatın əsas dəyərləri sülhün təmin olunması, təhlükəsizliyin qorunması, insan hüquqlarının müdafiəsi və davamlı inkişafın təşviqi istiqamətində fəal mövqe sərgiləyir. Ölkəmiz dəfələrlə BMT Baş Assambleyasının iclaslarında mühüm təşəbbüslərlə çıxış edib və beynəlxalq gündəlikdə olan aktual məsələlərlə bağlı aydın və prinsipial mövqe ortaya qoyub. Bundan əlavə, Azərbaycanın ərazi bütövlüyü məsələsi də BMT Təhlükəsizlik Şurası tərəfindən qəbul olunmuş qətnamələrdə öz əksini tapıb və beynəlxalq hüquq çərçivəsində dəstəklənib. Prezident İlham Əliyevin BMT Baş Assambleyasının 80-ci sessiyasında iştirak məqsədilə Amerika Birləşmiş Ştatlarının Nyu-York şəhərinə etdiyi işgüzar səfər də ölkəmizin beynəlxalq arenadakı fəal mövqeyinin və diplomatik fəallığının bariz nümunəsi kimi yadda qaldı. Ölkə Prezidentinin BMT-nin Nyu-Yorkdakı mənzil-qərargahında Baş Assambleyanın 80-ci sessiyası çərçivəsində keçirilən yüksək səviyyəli müzakirələrdə iştirakı və apardığı görüşlər Azərbaycanın beynəlxalq münasibətlərdə fəal rolunun və diplomatik nüfuzunun göstəricisidir.
“Nyu-Yorkda BMT Baş Assambleyasının 80-ci sessiyası çərçivəsində keçirilən rəsmi qəbulda ABŞ Prezidentinin dövlətimizin başçısı haqqında səsləndirdiyi xoş sözlər və dəyərli fikirlər Prezident İlham Əliyevin beynəlxalq aləmdə artan nüfuzunun və qlobal liderlik keyfiyyətlərinin yüksək qiymətləndirildiyini nümayiş etdirdi. Bu fikirlər Azərbaycan liderinə və ölkəmizə göstərilən ehtiramın bariz təzahürü kimi yadda qaldı”, - deyə siyasi şərhçi vurğulayıb.
Onun sözlərinə görə, Prezident İlham Əliyev BMT Baş Assambleyasının 80-ci sessiyasında çıxışı ilə Azərbaycanın qlobal siyasi proseslərdə tutduğu prinsipial mövqeyi və beynəlxalq münasibətlər sisteminə baxışını ortaya qoydu. Dövlətimizin başçısı çıxışında beynəlxalq hüququn norma və prinsiplərinə hörmətin zəruriliyini vurğulamaqla yanaşı, regional və qlobal təhlükəsizlik, ədalətin bərpası və suveren dövlətlərin hüquqlarının qorunması istiqamətində Azərbaycanın qətiyyətli mövqeyini nümayiş etdirdi. Prezidentin bəyanatları, həmçinin postmünaqişə dövründə regionda formalaşan yeni geosiyasi reallıqların beynəlxalq ictimaiyyət tərəfindən qəbul olunması baxımından mühüm siyasi siqnal kimi qiymətləndirilə bilər. Prezident İlham Əliyev BMT Baş Assambleyasının 80-ci sessiyasında çıxışı zamanı Azərbaycanın 30 ilə yaxın davam edən işğala son qoyaraq ərazi bütövlüyünü BMT Nizamnaməsinə və beynəlxalq hüquqa əsaslanaraq bərpa etdiyini bəyan etdi. Prezident Ermənistanın etnik təmizləmə siyasəti, beynəlxalq qətnamələrin icrasız qalması və Minsk qrupunun fəaliyyətinin nəticəsizliyi barədə beynəlxalq ictimaiyyətə ciddi mesajlar verdi. Dövlətimizin başçısı postmünaqişə dövründə Azərbaycanın sülh təşəbbüsləri irəli sürdüyünü, Ermənistanla münasibətlərin normallaşdırılması üçün konkret addımlar atdığını vurğuladı. Vaşinqtonda əldə olunmuş razılaşmalar və sülh müqaviləsinin paraflanması bu prosesin uğurlu nəticəsi kimi qiymətləndirildi. Prezident, həmçinin Azərbaycanın qlobal enerji təhlükəsizliyində rolu, iqlim dəyişiklikləri ilə mübarizədə təşəbbüskarlığı və COP29-a ev sahibliyi ilə bağlı planları haqqında danışdı, ölkənin iqtisadi uğurlarını, azad olunmuş ərazilərdə aparılan bərpa işlərini və “Böyük Qayıdış” proqramının icrasını xüsusi vurğuladı.
“Prezident İlham Əliyev çıxışında beynəlxalq münasibətlər sistemində ikili standartlara son qoyulmasının vacibliyini diqqətə çatdırdı. Dövlətimizin başçısı beynəlxalq hüququn norma və prinsiplərinə hamılıqla riayət edilməsinin, dövlətlərin suverenliyi və ərazi bütövlüyünə hörmətin təmin olunmasının qlobal sabitlik və ədalət üçün əsas şərt olduğunu vurğuladı. Prezident, həmçinin beynəlxalq təşkilatları vahid yanaşma sərgiləməyə çağıraraq, daha ədalətli və şəffaf beynəlxalq nizamın qurulmasına ehtiyac olduğunu bildirdi.
Beləliklə, Prezident İlham Əliyevin BMT Baş Assambleyasındakı çıxışı Azərbaycanın beynəlxalq münasibətlər sistemində prinsipial, hüquqa əsaslanan və suverenliyə hörmət üzərində qurulmuş siyasətinin parlaq təcəssümü oldu. Bu çıxış təkcə ölkəmizin deyil, bütövlükdə ədalət axtaran dövlətlərin səsini beynəlxalq ictimaiyyətə çatdırdı. Azərbaycan liderinin ikili standartlara qarşı sərt mövqeyi, sülh və ədalətə çağırışları, yeni dünya düzənində güc deyil, hüququn əsas prinsip kimi qəbul edilməsinin vacibliyinə dair mesajı beynəlxalq tribunanın siyasi çəkisini daha da artırdı. Bu çıxış Azərbaycanın yüksələn geosiyasi mövqeyinin və qlobal proseslərə təsir imkanlarının növbəti təsdiqi kimi tarixə düşdü”, - deyən Emin Bağırov fikirlərini yekunlaşdırıb.
Bölmənin digər xəbərləri
