BMT: Myanmada etnik təmizləmə davam edir
Bakı, 6 mart, AZƏRTAC
BMT-nin Myanma hökumətinə Rakhayn ştatında humanitar dəhlizi təmin etmək barədə çağırışına baxmayaraq, ölkədə rohinca xalqının nümayəndələrinə qarşı etnik təmizləmə siyasəti davam edir.
AZƏRTAC TASS informasiya agentliyinə istinadla xəbər verir ki, bunu BMT-nin Baş katibinin insan haqları üzrə köməkçisi Endryu Hilmor bildirib. Onun sözlərinə görə, etnik təmizləmə “terror və aclıq kampaniyası” ilə müşayiət olunur.
Fevral ayında BMT-nin Baş katibi Antoniu Quterriş Myanmada rohincalı müsəlmanların öz evlərindən qovulmasını etnik təmizləmə adlandırmışdı. O, Myanma hökumətinə Rakhayn ştatına humanitar dəhlizi təmin etmələri, beynəlxalq ictimaiyyətə isə “Banqladeşə sığınanlara dəstək göstərmələri” barədə çağırış etmişdi.
Xatırladaq ki, ötən il avqustun 25-də Myanmanın qərbində rohinca xalqına məxsus müsəlmanların yaşadığı Rakhayn ştatında vəziyyət yenidən kəskinləşib. Hökumət qoşunlarının və silahlıların hücumları nəticəsində minlərlə müsəlman vəhşicəsinə öldürülüb, 200-ə yaxın kənd yer üzündən silinib. 1970-ci illərdən bəri müntəzəm hücumlar və etnik təmizləmələr səbəbindən Myanmada sayları 2 milyondan çox olan müsəlmanların 84 faizi qonşu ölkələrə sığınmaq məcburiyyətində qalıb.
Bölmənin digər xəbərləri
