“Böyük Qayıdış”, sadəcə, soydaşlarımızın geri dönməsi deyil, dövlətin hərtərəfli dirçəliş strategiyasıdır - RƏY
Bakı, 29 oktyabr, AZƏRTAC
Cəbrayıl rayonunun Horovlu, Zəngilan rayonunun Məmmədbəyli və Ağalı kəndlərində Prezident İlham Əliyevin sakinlərlə görüşü Zəfərdən sonra dövlət siyasətinin mərkəzində dayanan “Böyük Qayıdış” Proqramının növbəti mərhələsi kimi tarixə düşdü. Bu görüşlər, əslində, təkcə bu kəndlərin deyil, bütöv bir dövrün rəmzinə çevrildi. Prezident İlham Əliyevin sözləri ilə desək, “Bu gün Horovlu kəndinin tarixində çox əlamətdar, unudulmaz, tarixi bir gündür. Kəndin sakinləri öz doğma torpağına qayıdırlar”. Bu cümlə, sadəcə, bir təbrik deyil - 30 illik nisgilin sonu, ədalətin bərpası və tarixi Zəfərin sosial reallığa çevrilməsi deməkdir. Cəbrayıl, Füzuli istiqamətindən başlanan Zəfər yürüşü 2020-ci ildə Azərbaycanın hərb meydanında tarix yazdığı an idi, bu gün isə həmin tarixin müasir bərpa səhifələri Horovluda, Məmmədbəylidə, Ağalıda və bütöv Qarabağda yazılır.
AZƏRTAC xəbər verir ki, bu sözləri Milli Məclisin deputatı Səttar Möhbalıyev söyləyib.
Deputat bildirib ki, Horovlu, Məmmədbəyli, Ağalı “Böyük Qayıdış”ın parlaq modelidir. Prezident İlham Əliyevin çıxışı bir daha göstərdi ki, “Böyük Qayıdış”, sadəcə, məcburi köçkünlərin geri dönmələri deyil, dövlətin hərtərəfli dirçəliş strategiyasıdır. 334 fərdi ev, məktəb, uşaq bağçası, tibb məntəqəsi, iş yerləri və müasir infrastruktur - bütün bunlar Horovlunun yeni həyatının təməl daşlarıdır. Əvvəl 1500 nəfər əhalisi olan kəndin artıq 2000-dən çox sakini olacaq. Bu, həm demoqrafik artımın, həm də iqtisadi dinamizmin göstəricisidir. Dövlətimizin başçısının dediyi kimi: “Burada rahat, xoşbəxt həyat sürmək üçün bütün imkanlar var. Dövlət sizin üçün bütün şəraiti yaradıb”. Horovlu indi təkcə bərpa olunmuş bir yaşayış məntəqəsi deyil, “Böyük Qayıdış” konsepsiyasının “laboratoriyası”dır. Burada sosial rifah, ekoloji dayanıqlılıq, müasir idarəçilik və enerji müstəqilliyi bir model kimi formalaşdırılır. Prezident İlham Əliyevin çıxışında xüsusilə diqqət çəkən məqam ədalətin təntənəsi ideyasıdır. Dövlətimizin başçısı qeyd etdi ki, bugünkü reallıq, bugünkü gün, o cümlədən ədalətin təntənəsidir. Ədalətə inanmaq və onu təmin etmək lazımdır. Bax, bizim xalqımız həm ədalətə inanıb, həm də onu təmin edib. Bu fikir təkcə siyasi ritorika deyil, Azərbaycan dövlətinin postmüharibə fəlsəfəsinin əsas sütunudur. Çünki bu torpaqlara qayıdış həm torpaq üzərində, həm də yaddaşda qazanılmış Qələbənin davamıdır.
“Horovluda bərpa olunan evlər, salınan yollar, tikilən məktəblər – bütün bunlar ədalətin inşasıdır. Bu, düşmənin viran qoyduğu yurdların dirçəlməsi ilə yanaşı, insan ləyaqətinin bərpasıdır. Prezident İlham Əliyev Horovludan çıxış edərək Cəbrayıl rayonunun iqtisadi inkişaf istiqamətlərini də müəyyənləşdirdi. Onun sözləri ilə desək, “Araz Vadisi sənaye zonası artıq fəaliyyətdədir. Orada üç müəssisə fəaliyyət göstərir, yaxın gələcəkdə onların sayı təqribən 20-yə çatacaq”. Bu, dövlətin məqsədyönlü siyasətinin nəticəsidir: işğaldan azad edilmiş ərazilər, sadəcə, bərpa edilmir, həm də iqtisadi müstəqilliyin yeni mərkəzlərinə çevrilir. İki Günəş Elektrik Stansiyasının təməli qoyulub, üçüncüsünün tikintisi isə davam edir. Cəbrayıl və Zəngilan rayonlarında ümumilikdə 400 meqavat gücündə enerji istehsalı planlaşdırılır. Bu, bir şəhərin enerji tələbatına bərabərdir və yaşıl enerji zonasının reallığa çevrildiyini göstərir. Azərbaycan burada enerji diplomatiyasının yeni modelini – daxildə yaşıl iqtisadiyyat, xaricdə enerji ixracı kimi strateji konsepsiyanı həyata keçirir”, - deyə S.Möhbalıyev diqqətə çatdırıb.
O əlavə edib ki, dövlətimizin başçısının çıxışında “işsizlik olmamalıdır” tezisi xüsusi önəm daşıyır. Bu, dövlətin sosial siyasətinin mahiyyətini ifadə edir. Hər bir ailəyə on iki sot torpaq sahəsinin ayrılması, kənd təsərrüfatı üçün geniş ərazilərin istifadəyə verilməsi yerli iqtisadiyyatın insan üzərində qurulduğunu göstərir.
Aqroparklar, heyvandarlıq, arıçılıq, üzümçülük, meyvəçilik – bütün bunlar Horovlunun gələcəyini təmin edən davamlı həyat modelidir. Bu, həm də Prezident İlham Əliyevin illər əvvəl dediyi “Azad olunan şəhərlər əvvəlkindən daha gözəl olacaq” vədinin reallaşmasıdır.
Bu gün Horovluda qurulan həyat həmin sözlərin praktik, sosial və mənəvi təsdiqidir. Cəbrayılın azad edilməsinin beşinci ildönümü ərəfəsində reallaşan bu səfər Zəfər tarixinin canlı təcəssümüdür.
“Dövlətimizin başçısının Horovluda, Məmmədbəylidə, Ağalıda səsləndirdiyi fikirlər bir daha sübut edir ki, Azərbaycan Zəfəri ilə başladığı yolu “Böyük Qayıdış”la davam etdirir. Bu yol həm ədalətin bərpası, həm də milli ruhun dirçəldilməsi yoludur.
Horovlu kəndinin bərpası, Cəbrayılın sənaye və enerji mərkəzinə çevrilməsi, yeni həyatın qurulması – bunların hər biri Azərbaycan dövlətinin gücünü, Prezidentin uzaqgörən siyasətini və xalqın iradəsini göstərir. Bu gün Horovluya, Məmmədbəyliyə, Ağalıya qayıdan hər bir insan, sadəcə, öz evinə yox, müstəqil Azərbaycanın Qələbə salnaməsinə dönür”, - deyə Səttar Möhbalıyev fikrini yekunlaşdırıb.
Bölmənin digər xəbərləri
