BRİTANİYA PARLAMENTİNİN ÜZVLƏRİ XOCALI FACİƏSİNİ SOYQIRIMI KİMİ TANIMAĞA ÇAĞIRMIŞLAR
Fevralın 22-də Britaniya parlamentində Xocalı soyqırımının 15-ci ildönümünə həsr olunmuş tədbirdə çıxış edən Lordlar palatasının üzvləri Xocalı faciəsini soyqırımı kimi tanımağa çağırmışlar.
Azərbaycanın Birləşmiş Krallıqdakı səfirliyindən AZƏRTAC-a daxil olmuş məlumatda deyilir ki, Heydər Əliyev Fondunun dəstəyi ilə keçirilən tədbirdə çıxış edən səfir Rəfael İbrahimov Britaniyanın siyasi dairələrini və ictimaiyyətini Xocalı soyqırımı məsələsinə biganə qalmamağa çağırmışdır. Lordlar palatasının üzvlərinə və digər iştirakçılara Qarabağ münaqişəsinin tarixi, erməni təcavüzünün ağır nəticələri barədə məlumat verilmiş, xüsusi xəritələr, video-fotokadrlar, o cümlədən Xocalı soyqırımına dair Çingiz Mustafayevin lentə aldığı kadrlar nümayiş etdirilmişdir. Bütün bunlar iştirakçılarda böyük sarsıntı doğurmuşdur. Səfir R.İbrahimov Azərbaycan tərəfinin Xocalı faciəsinin dünya ölkələrinin parlamentləri tərəfindən soyqırımı kimi tanınması istiqamətində fəaliyyət göstərəcəyini bildirmiş və bu işdə Britaniya parlamentinin dəstəyinin də vacib olduğunu vurğulamışdır. Eyni zamanda demişdir ki, bütün bu faciələrə baxmayaraq, Azərbaycan tərəfi yenə də münaqişənin sülh yolu ilə həll olunmasını istəyir.
Səfir ümummilli lider Heydər Əliyevin Azərbaycan dövlətçiliyinin qorunub saxlanılması və möhkəmləndirilməsində, regionda sülhün bərqərar olunmasında əvəzsiz xidmətlərindən, uğurlu neft strategiyasından və onun zirvəsi olan BTC neft kəmərindən də ətraflı danışmışdır.
İlk dəfə olaraq, dünyanın nüfuzlu ölkəsinin parlamentinin rəsmi nümayəndələri tərəfindən Xocalı faciəsinin soyqırımı kimi tanınmasına çağırışlar səsləndirilmişdir. Baronessa O’Kohoyn çıxışında Xocalı hadisələrinin keçmiş sovet ordusunun 366-cı motoatıcı alayının dəstəyi ilə Ermənistan ordusu tərəfindən törədildiyini, şəhərin, faktik olaraq, məhv edildiyini bildirmiş, öldürülən, əsir götürülən və itkin düşən şəxslər barədə konkret rəqəmlər sadalamışdır. O’Kohoyn demişdir ki, Azərbaycan hökuməti Xocalı hadisələrini kütləvi qətl hesab etmir və bunun soyqırımı kimi tanınmasını istəyir. Xocalıda baş vermiş dəhşətlərin ingilisdilli KİV-lərdə geniş işıqlandırıldığını xatırladan baronessa Lordlar palatasının digər üzvlərini də ədalətli mübarizədə Azərbaycanı dəstəkləməyə çağırmışdır.
Müstəqil ekspert Deyvid Barçhordun çıxışı birmənalı olaraq, Ermənistanın təcavüzkar siyasətinin ifşasına yönəldilmişdi. O, Ermənistanın bu siyasətinin mahiyyətini əsaslı dəlillərlə açıqlamış, Azərbaycanın qaçqın və məcburi köçkünlər problemi haqqında ətraflı məlumat verərək, dünyanın bu baxımdan ən çətin vəziyyətə düşmüş ölkəsi olan Azərbaycanı dəstəkləməyə çağırmışdır. Barçhord Avropa Birliyini də Azərbaycandakı bu insanların taleyinə biganəlikdə günahlandırmış, bütün dünyanın bu problemə diqqət yetirməsinin zəruriliyini söyləmişdir.
Tədbirdə Azərbaycandakı qaçqın-köçkünlərin sayı, dövlət büdcəsindən onlar üçün ayrılan pul vəsaitlərinə dair statistik məlumatlar səsləndirilmiş, çadır düşərgələrində çəkilmiş kadrlar nümayiş etdirilmişdir.
Bölmənin digər xəbərləri
