BSU-da müasir şəhərsalma və insan psixologiyasına dair beynəlxalq konfrans təşkil olunub
Bakı, 29 iyun, AZƏRTAC
Bakı Slavyan Universiteti (BSU), Müasir Azərbaycan Psixoloqları Cəmiyyəti və Psixologiya Elmi-Tədqiqat İnstitutunun birgə təşkilatçılığı ilə “Psixologiya Zirvəsi – 4. Şəhər, insan və psixoloji rifah” mövzusunda beynəlxalq elmi-praktik konfrans keçirilib.
AZƏRTAC xəbər verir ki, BSU-nun rektoru Anar Nağıyev açılış nitqində IV Beynəlxalq Psixologiya Zirvəsi Konfransına universitetin üçüncü dəfə ev sahibliyi etməsindən məmnunluğunu ifadə edib. Rektor qeyd edib ki, belə beynəlxalq elmi platformaların təşkili psixologiya sahəsində elmi əməkdaşlığın genişlənməsi, təcrübə mübadiləsinin aparılması və müasir çağırışların müzakirəsi baxımından böyük əhəmiyyət daşıyır.
A.Nağıyev konfransın əsas mövzularından biri olan “Şəhər, insan və psixoloji rifah” istiqamətinin xüsusi aktuallıq daşıdığını vurğulayıb. O bildirib ki, müasir dövrdə şəhərsalma yalnız fiziki infrastrukturun formalaşdırılması deyil, eyni zamanda, insanın psixoloji rahatlığının, sosial əlaqələrinin və həyat keyfiyyətinin təmin olunmasına xidmət edən mühüm amillərdən biridir. Azərbaycanın sürətli inkişafı, yeni şəhər mühitlərinin formalaşması və müasir urbanizasiya prosesləri fonunda insan amilinin nəzərə alınması vacibdir.
Milli Məclisin deputatı, Müasir Azərbaycan Psixoloqları Cəmiyyətinin sədri, professor Bəxtiyar Əliyev çıxışında konfransın mövzusunun müasir dövrün aktual psixoloji problemlərinin araşdırılması baxımından əhəmiyyət daşıdığını bildirib. O, şəhər mühitinin insanın psixoloji vəziyyətinə, sosial münasibətlərinə və rifahına təsir edən əsas amillərdən biri olduğunu vurğulayıb.
Bəxtiyar Əliyev Azərbaycanda psixologiya elminin inkişaf mərhələlərindən, bu sahədə mühüm elmi məktəblərin formalaşmasından və aparıcı alimlərin rolundan bəhs edib. O qeyd edib ki, psixologiya elminin inkişafı cəmiyyətin sosial-mənəvi tərəqqisi, insan kapitalının gücləndirilməsi və psixi rifahın təmin olunması baxımından strateji əhəmiyyət daşıyır.
Psixologiya Elmi-Tədqiqat İnstitutunun sədri Elnur Rüstəmov çıxışında Azərbaycan, Türkiyə və Özbəkistan arasında elm sahəsində mövcud olan əməkdaşlıq əlaqələrinin əhəmiyyətindən danışıb. O bildirib ki, institut tərəfindən Türkiyənin aparıcı universitetləri və elmi qurumları ilə uzun illərdir psixologiya sahəsində uğurlu təcrübə və bilik mübadiləsi həyata keçirilir. E.Rüstəmov gələcəkdə də beynəlxalq əməkdaşlığın genişləndirilməsi, elmi layihələrin artırılması və psixologiya sahəsində yeni inkişaf istiqamətlərinin formalaşdırılması istiqamətində fəaliyyətlərin davam etdiriləcəyini söyləyib.
Milli Məclisin deputatı, tarix elmləri doktoru Vasif Qafarov çıxışında bu kimi beynəlxalq elmi konfransların psixologiya elminin inkişafı, müasir çağırışların elmi müstəvidə araşdırılması və mütəxəssislər arasında təcrübə mübadiləsinin genişləndirilməsi baxımından mühüm rol oynadığını bildirib.
Konfrans çərçivəsində şəhər, insan və ailə münasibətləri, psixoloji təhlükəsizliyin formalaşmasında urban mühitin rolu, müasir şəhərləşmənin psixoloji aspektləri, psixoterapevtik yanaşmalar, klinik psixologiyada aktual problemlər, insan rifahı və sosial münasibətlərin transformasiyası, təhsil mühitində psixoloji xidmət və digər aktual mövzular ətrafında elmi təqdimatlar keçirilib və müzakirələr aparılıb.
Bağlanış mərasimində tədbirin elmi və təşkilati nəticələri yüksək qiymətləndirilib, bu kimi beynəlxalq elmi platformaların gələcəkdə davam etdirilməsinin vacibliyi vurğulanıb.
Bölmənin digər xəbərləri
