Bu il Azərbaycan Turizm İnstitutunun 230 tələbəsinin məzun adını qazanmaq şansı vardır
Bakı, 16 iyun (AZƏRTAC). Hazırda Azərbaycan Turizm İnstitutu (ATİ) ikinci məzun buraxılışına hazırlaşır.
İnstitutdan AZƏRTAC-a bildirmişlər ki, bu il ATİ-də 8 ixtisas üzrə 230 tələbənin məzun adını qazanmaq şansı vardır. Bunlardan 220-si artıq lazımi balı toplayıb, dövlət imtahanına buraxılış imkanı əldə etmişdir.
Dövlət imtahanları iki formada olacaqdır. Əvvəlcə tələbələr diplom işlərini müdafiə edəcəklər. Onlar Azərbaycan dili və xarici dildə müdafiə edəcəkləri mövzu ətrafında attestasiya komissiyası üzvlərinin suallarını cavablandıracaqlar. İkincisi isə şifahi dövlət imtahanı olacaqdır. Şifahi imtahanda tərtib edilən biletlərdəki suallar həm bir neçə xarici dil bilgilərini, həm də tələbələrin seçdikləri ixtisası əhatə edəcəkdir.
Ötən il ATİ-nin 14 nəfər məzunu, eyni zamanda, Avstriyanın Krems Universitetinin diplomunu almışdır. Bu il ikili diplom proqramında institutun 26 tələbəsi oxuyur.
Bölmənin digər xəbərləri
