Bu il Azərbaycana gələn xarici turistlərin sayında artım müşahidə olunur
Bakı, 13 avqust (AZƏRTAC). Son illər Azərbaycana üz tutan xarici turistlərin sayı artmaqdadır.
Ötən il ərzində Azərbaycana gələn əcnəbi turistlərin sayı bir milyon 962 min 906 nəfər təşkil etmişdir ki, bu da 2009-cu ilin göstəricisi ilə müqayisədə 7,2 faiz çoxdur.
Mədəniyyət və Turizm Nazirliyindən AZƏRTAC-a bildirmişlər ki, bu il ölkəyə gələn əcnəbi turistlərin sayının 2 milyonu ötəcəyi gözlənilir. Bu ilk növbədə Azərbaycanda turizm obyektlərinin sayının artması və xidmət mədəniyyətinin səviyyəsinin yüksəlməsi ilə bağlıdır. Əgər 2001-ci ildə ölkəmizdə 18 turizm müəssisəsi fəaliyyət göstərirdisə, 2010-cu ildə bu rəqəm təxminən 12 dəfə artaraq 212-yə çatmışdır. Hazırda isə respublikada 50-dən çox yeni mehmanxana inşa olunur. Bu ilin sonunadək təkcə paytaxtda 6 yeni beynəlxalq brendli beşulduzlu mehmanxananın istifadəyə verilməsi planlaşdırılır.
Bütün bunlar bir daha deməyə əsas verir ki, yaxın illərdə Azərbaycan bölgənin ən gözəl turizm məkanlarından biri kimi xarici vətəndaşların diqqət mərkəzində olacaqdır.
Bölmənin digər xəbərləri
