Bu il irihəcmli obyektlərdə turistlərə göstərilən xidmətin qiyməti 10-15 faiz aşağı düşmüşdür
Bakı, 22 iyun (AZƏRTAC). İyunun 22-də “Turizmə Dəstək” Gənclər Koalisiyası 2011-ci ilin “Turizm ili” olmasını nəzərə alaraq daxili turizmi inkişaf etdirmək və turizm sahəsində mövcud problemlərin aradan qaldırılmasının həlli yollarını axtarmaq, həmin problemləri əlaqədar qurumların diqqətinə çatdırmaq məqsədi ilə “Turizmin inkişafı: nailiyyətlər, problemlər və perspektivlər” adlı konfrans keçirmişdir.
AZƏRTAC xəbər verir ki, tədbiri giriş sözü ilə açan təşkilatın sədri Ramiz Alıyev turizm şirkətlərindən, mütəxəssislərindən, gənclər və QHT təşkilatlarından Koalisiyaya daxil olan təkliflər və problemlərin məzmunu haqqında danışmış və həmin problemlərin həlli yollarının müzakirə olunmasını təklif etmişdir.
Mədəniyyət və Turizm Nazirliyinin daxili turizmin inkişafı sektorunun baş məsləhətçisi Vüqar Şıxməmmədov Koalisiyanın daim nazirliklə sıx əlaqədə olduğunu və gördükləri işlərinin təqdirəlayiq olduğunu qeyd etmişdir. “Prezident İlham Əliyevin sərəncamı ilə 2011-ci ilin Azərbaycanda turizm ili elan olunması bu sahənin daha da inkişaf etdirilməsi istiqamətində mühüm addım olmuşdur. Bizim nazirlik sərəncamın icrasına böyük əhəmiyyət verir. Qarşıdakı illərdə də turizm iqtisadiyyatda vacib yer tutacaq və bu sahədə vacib məsələ qiymətlərlə xidmətlərin üst-üstə düşməsidir.
V.Şıxməmmədov bu günlərdə bölgələrdə monitorinq keçirildiyini demişdir. Məlumat vermişdir ki, ilkin araşdırmalara görə, bu il irihəcmli obyektlərdə turistlərə göstərilən xidmətin qiyməti 10-15 faiz aşağı düşmüşdür. Bakı və regionlarda turizm infrastrukturunun inkişaf etdirilməsinə dair hazırda regionlarda 43 mehmanxana tikilir, Bakıda 5 ulduzlu otellərin sayı artmışdır.
V.Şıxməmmədov bütün bu sahələrdə qiymətlərin aşağı olacağını qeyd etmişdir. Bildirmişdir ki, bu yaxınlarda monitorinqin nəticələri elan olunacaqdır.
“The Grand Hotel Europe” otelinin baş direktoru Tolqa Akkaş Azərbaycanın mədəniyyətini, keçmişini, tarixini, gözəlliyini əks etdirən, ən gözəl iqlimin, sənətkarlığın, təbiətin, qədim məskənlərin mövcud olduğu gözəlliyi ilə hər kəsi heyran etdiyini söyləmişdir. Onun sözlərinə görə, ən gözəl turist sərvətlərinin cəmləndiyi Azərbaycan turizmi inkişaf etdirmək üçün əlverişli ərazidir.
Bakı Dövlət Universitetinin xarici ölkələrin iqtisadi-siyasi coğrafiyası və turizm kafedrasının müdiri, dosent Həbibə Soltanova ölkəmizdə əvvəlki illərə nisbətən son vaxtlar bu sahədə fəaliyyətin gücləndirildiyini demişdir. H.Soltanova bu gün otellərdə turistlərə xidmət göstərən 250-dən artıq yüksək səviyyəli mütəxəssisin hazırlandığı barədə də danışmışdır. Əlavə etmişdir ki, mütəxəssislərin hazırlanması proqramı Avropa standartlarına uyğun keçirilir və gənclərin fəallığı da sevindirici haldır.
Milli Məclisin deputatı Etibar Hüseynov kifayət qədər turizm potensialı olan Azərbaycanın bu sahədə dünyanın aparıcı ölkələri ilə rəqabətə girməyə və öz potensialını nümayiş etdirməyə qadir olduğunu vurğulamışdır. “Azərbaycanın turizm imkanları ilə maraqlanan əcnəbilər bu sahəyə göstərilən dövlət qayğısını da yüksək qiymətləndirirlər”, - deyən deputat ölkəmizin təbii sərvətləri ilə turistləri cəlb etməsinin məqsədyönlü olduğunu demişdir.
Konfransda dövlət və hökumət nümayəndələri, Milli Məclisin deputatları, turizm mütəxəssisləri, turizm şirkətlərinin, gənclər təşkilatlarının, QHT-lərin rəhbərləri və turizm sahəsi ilə əlaqədar digər qurumların nümayəndələri iştirak etmişlər.
######
Bölmənin digər xəbərləri
