Bu ilin birinci rübündə Azərbaycan və Gürcüstan arasında ticarət dövriyyəsi 1,9 faiz artıb
Tbilisi, 23 aprel, AZƏRTAC
Cari ilin yanvar-mart ayları ərzində Gürcüstanın xarici ticarət dövriyyəsi 2024-cü ilin analoji dövrü ilə müqayisədə 16,1 faiz artaraq 5,6 milyard dollar təşkil edib (mütəşəkkil olmayan ticarət istisna olmaqla).
AZƏRTAC xəbər verir ki, bu barədə Milli Statistika Xidməti məlumat yayıb.
Hesabat dövründə ölkəyə 4,2 milyard dollar dəyərində məhsul idxal edilib ki, bu da 2024-cü ilin yanvar-mart aylarının göstəricisindən 20,1 faiz çoxdur. İxracın həcmi isə 2024-cü ilin yanvar-mart ayları ilə müqayisədə 5,7 faiz artaraq 1,4 milyard dollar təşkil edib.
Gürcüstanın ticarət saldosunun kəsiri 2,8 milyard dollar təşkil edib ki, bu da ötən ilin analoji göstəricisindən 28,8 faiz çoxdur.
Qeyd olunan dövrdə Gürcüstan-Azərbaycan ticarət dövriyyəsinə gəlincə, ötən illə müqayisədə 1,9 faiz artım qeydə alınıb ki, bu da 305,5 milyon dollar vəsait təşkil edib. Bu göstərici ilə Azərbaycan Gürcüstanın xarici ticarət tərəfdaşları sırasında 5-ci yerdə qərarlaşıb.
Hesabat dövründə ABŞ Gürcüstanın əsas ticarət tərəfdaşları arasında birinci yerdədir. Belə ki, iki ölkə arasında xarici ticarət dövriyyəsi 670 milyon dollar təşkil edib.
Gürcüstanın xarici ticarət tərəfdaşları sırasında Türkiyə 663,3 milyon dollarla ikinci, Rusiya 642,8 milyon dollarla üçüncü, Çin isə 443,5 milyon dollar ilə dördüncü yerdə qərarlaşıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
