Bundesliqa tarixində ilk: “Union Berlin” klubunda qadın baş məşqçi
“Union Berlin” klubunun ötən gün Bundesliqanın 29-cu turu çərçivəsində səfərdə “Haydenhaym”a 1:3 hesablı məğlubiyyətindən sonra komandanın baş məşqçisi Steffen Baumqartın fəaliyyətinə son verilib.
AZƏRTAC xəbər verir ki onun yerinə baş məşqçi vəzifəsinə Mari-Luiza Eta gətirilib. Bununla da o, ilk qadın baş məşqçi kimi Bundesliqa tarixinə düşüb.
Klubun açıqlamasında son 14 oyunda cəmi iki qələbə qazanan komandada yeni baş məşqçinin əsas vəzifəsinin “Union”un Bundesliqada qalmasını təmin etmək olduğu bildirilib.
Otuz dörd yaşlı M.Eta futbolçu karyerasında yarımmüdafiəçi kimi “Turbine Potsdam” klubunda çıxış edib. O, qadın futbolçular arasında Almaniya çempionu və Çempionlar Liqasının qalibi olub. Baş məşqçi kimi, U15-dən U23-ə qədər müxtəlif yaş qrupları üzrə Almaniya yığmalarına dəvət alıb. 2023-cü ildən “Union Berlin”də köməkçi məşqçi kimi fəaliyyət göstərib.
Qeyd edək ki, komanda hazırda 32 xalla 11-ci pillədə qərarlaşıb. Klubu təhlükəli zonadan cəmi 7 xal ayırır.
Bölmənin digər xəbərləri
