Cavid Vəliyev: Türkiyə-Ermənistan sərhədinin açılması Azərbaycanla birgə veriləcək qərardan asılıdır
Bakı, 14 may, AZƏRTAC
Türkiyə-Ermənistan münasibətlərinin normallaşması prosesi Azərbaycanla koordinasiya şəraitində həyata keçirilir və Ankara bu məsələdə Bakının mövqeyini əsas prioritet kimi nəzərə alır.
Bunu Beynəlxalq Münasibətlərin Təhlili Mərkəzində keçirilən dəyirmi masada çıxış edən BMTM-nin Xarici siyasət şöbəsinin müdiri Cavid Vəliyev bildirib.
Onun sözlərinə görə, Türkiyə ilə Ermənistan arasında aparılan danışıqlar sərhədlərin gələcəkdə açılması üçün müəyyən hazırlıq mərhələsi kimi qiymətləndirilə bilər.
“Türkiyə siyasətçilərinin açıqlamalarından da görünür ki, sərhədin açılması məsələsi müəyyən hazırlıq mərhələsindədir. Lakin sərhədin nə vaxt açılacağı Azərbaycanla birlikdə veriləcək qərardan asılı olacaq. Türkiyə bu prosesi Azərbaycansız davam etdirmir və bu, prinsipial məsələdir. Türkiyə cəmiyyətində və siyasi dairələrində bu məsələyə fərqli yanaşmalar mövcuddur.
Türkiyədə müəyyən dairələr hesab edir ki, sərhədlərin açılması Ermənistanın Baş naziri Nikol Paşinyanın mövqeyini gücləndirə bilər və artıq Azərbaycan faktoruna görə sərhədlərin bağlı saxlanılmasına ehtiyac yoxdur. Lakin qərarvermə prosesində iştirak edən əsas siyasi aktorlar sərhəd məsələsinin mühüm siyasi vasitə olduğunu düşünürlər. Onlar hesab edirlər ki, Azərbaycan-Ermənistan arasında yekun sülh sazişi imzalanmadan sərhədlərin açılması doğru yanaşma olmaz”, – deyə o bildirib.
C.Vəliyev əlavə edib ki, Türkiyə tərəfi bu mövqeni açıq və sərt formada bəyan etməsə də, bunun müəyyən siyasi səbəbləri var.
“Türkiyə Ermənistana müsbət mesaj verməyə çalışır. Bu həssas dövrdə sərt və neqativ açıqlamalar verməklə Ermənistan daxilində revanşist qüvvələrin mövqeyini gücləndirmək istəmirlər. Eyni zamanda, Paşinyan hakimiyyətinə də mesaj verilir ki, əgər Azərbaycanla normallaşma prosesi müsbət istiqamətdə davam etdirilərsə, gələcəkdə sərhədlərin açılması mümkün ola bilər. Yəni, burada söhbət sərhədlərin ümumiyyətlə açılmamasından getmir”, - deyə C.Vəliyev əlavə edib.
Müxbir - Səbinə Əlizadə
Bölmənin digər xəbərləri
