Bakı, 20 fevral, AZƏRTAC

İldən-ilə genişlənən özünüməşğulluq proqramı ölkəmizin cəbhəyanı bölgələrində da böyük maraq doğurur və proqrama cəlb olunanların sayı getdikcə artır. Prezident İlham Əliyevin tapşırığına əsasən icra olunan proqram aztəminatlı ailələrin kiçik təsərrüfatlarının və ailə biznesinin qurulması sahəsində çox uğurlu addımdır.

AZƏRTAC xəbər verir ki, Füzulu rayonunda və Cəbrayıl rayonunun Cocuq Mərcanlı kəndində özünüməşğulluq proqramı işsizlikdən əziyyət çəkən sakinlərin həyatında əhəmiyyətli rol oynayır. Onlar Əmək və Əhalinin Sosial Müdafiəsi Nazirliyinin həyata keçirdiyi həmin proqram çərçivəsində təlimlərə cəlb olunur, qısa müddət ərzində peşə və ixtisaslara yiyələnir, özlərinin seçdiyi fəaliyyət sahəsində tərtib etdikləri biznes planı uğurla müdafiə etdikdən sonra dövlətdən mal və aktivlər alaraq işləməyə başlayırlar.

Qarabağ müharibəsi veteranı avtomobil şinlərinin təmiri sexi açıb

Füzuli rayonun Aşağı Yağlıvənd kənd sakini Heydər Qasımov Qarabağ müharibəsinin iştirakçısıdır. O, doğma rayonunun Qacar, Yuxarı və Aşağı Divanalılar, Veysəlli kəndlərinin erməni yaraqlılarının hücumundan qorunmasında iştirak edib.1993-cü ilin avqustunda Seyidəhmədli kəndinin müdafiəsi zamanı yaralanandan sonra 2-ci qrup əlillik dərəcəsi alıb.

Heydər on ildən artıq müddətdə işsizlikdən əziyyət çəkib. Bir il əvvəl özünüməşğulluq proqramına qoşulan müharibə veteranı deyib: “Rayon məşğulluq mərkəzinin dəvəti ilə özünüməşğulluq proqramına qoşuldum. Təlimlərdə iştirak etdim və təkər təmiri sahəsində ən zəruri bilik və vərdişlərə yiyələndim. Biznes planım qəbul ediləndən sonra mənə avtomobil şinlərinin təmiri sexini yaratmağa icazə verdilər. Sexin fəaliyyəti üçün 14 sot torpaq ayrılıb. Hazırda həmin ərazisinin 36 kvadratmetr ərazisi olan sexdə fəaliyyət göstərirəm. Avtomobilin təkər və diskinin təmiri üçün lazım olan bütün avadanlıqlarla təmin olunmuşam. Əvvəllər ayrı-ayrı biznes sahiblərinin yanında fəaliyyət göstərsəm də, artıq bir neçə gündür ki, özüm kiçik sahibkar kimi fəaliyyətə başlamışam”.

Heydərə müharibə əlili kimi “NAZ Lifan” markalı avtomobil verilib. O, mənzillə təmin olunacağına da böyük ümid bəsləyir. Veteran deyib: “Üç nəfərdən ibarət kiçik ailəm var. 230 manat məbləğində Prezident təqaüdü və 236 manat pensiya alıram. Sex fəaliyyətə başlayandan sonra güzəranımız daha da yaxşılaşıb. Hər gün mənə avtomobil sahiblərindən müraciətlər daxil olur. Çalışıram ki, ilk gündən onların sifarişlərini tez, operativ və keyfiyyətlə yerinə yetirəm. Keyfiyyətli xidmət isə həmişə razılıq doğurur. Ona görə, müraciətlərin sayında artım hiss edirəm. Ümid edirəm ki, özünüməşğulluq proqramına qoşulmağım ailəmizin həyatında əsaslı dönüş yaradacaq”.

Gənc dönərçi öz seçimindən razıdır

Gənc dönərçi Vüsal Mehralıyev bir ilə yaxındır ki, Horadiz şəhərinin mərkəzində əhaliyə xidmət göstərir. Kiçik biznes fəaliyyətinə qoşulanadək o da işsizlkdən əziyyət çəkib və valideyn himayəsində yaşayıb. Qril, dönər aparatı, toster, kartof qızartmaq üçün elektrik qızdırıcı soba, soyuducu, habelə sexdə istifadə etmək üçün lazım olan digər avadanlıqlarla təmin olunub.

Vüsal özünün yeni fəaliyyət sahəsindən razılıqla söhbət açır: “İşsiz qalmaq, qazanc sahibi olmamaq məni çox narahat edirdi. Çox fikirləşsəm də, özümə iş yeri yaratmaq üçün haradan və nədən başlamaq lazım gəldiyini tapa bilmirdim. Nəhayət, rayon məşğulluq mərkəzinə üz tutdum və xidmət sahəsinə maraq göstərdiyimdən dönərçi peşəsini seçdim. Təlimlərə cəlb olundum, lazımi bacarıqlara yiyələndim və biznes planıma uyğun olaraq aktivlərlə təmin olundum. Artıq bir ilə yaxındır ki, işləyirəm. Hər gün 30-35, bəzən daha çox müştərim olur. Yeni ailə qurmuşam və uğur qazanacağım halda fəaliyyətimi genişləndirməyi düşünürəm”.

Xaləddin İsmayılov: “Arzum ailə təsərrüfatını daha da genişləndirməkdən ibarətdir”

Fevralın 19-da öz biznes-planına uyğun olaraq qurulan istixana təsərrüfatı Horadiz şəhərində məcburi köçkün Xaləddin İsmayılova təhvil verilib. Rayon məşğulluq idarəsinin əməkdaşları onu aktivlərlə təmin edərək yeni fəaliyyət sahəsində uğurlar arzulayıblar.

Xaləddin deyib: “Təsərrüfat işinə böyük marağım olsa da, onu necə həyata keçirmək mənim üçün müşkülə çevrilmişdi. Özünüməşğulluq proqramına qoşulamaqla bu arzumu reallaşdıra bildim. İndi mənim əkib-becərməyim üçün 70 sot torpaq sahəsi ayrılıb. Onun 192 kvadratmetri istixana təsərrüfatıdır. Bu, o deməkdir ki, ilboyu burada sevdiyim fəaliyyət sahəsi ilə məşğul olacam və camaatımızın bostan-tərəvəz məhsullarına olan tələbatın ödənilməsinə çalışacağam. Qarşıdan yaz gəlir, torpaq getdikcə oyanır, havalar qızmağa başlayır. Ona görə də elə bu gündən işə başlayacaq və torpağı belləyəndən sonra yavaş-yavaş ilk toxum və şitilləri basdırcağam”.

“İlk addımdan çox şey başlayır. Bu gün də mənim üçün təsərrüfat sahibi kimi işə başlamağımın ilk günüdür. Məqsədim qəsəbə sakinlərini xiyar, pomidor, kartof, soğan, lobya və digər məhsullara olan tələbatını ödəməkdə kömək etmək, zaman keçdikcə təsərrüfatı genişləndirərək qardaşlarımı da bu işə cəlb etməkdir. Bu torpaq məhsuldar torpaqdır, özüm isə işləməyi sevirəm. Ona görə də hesab edirəm ki, təsərrüfatı genişləndirmək və iki ildən sonra dövlətin bizə göstərdiyi bu dəstəyin sayəsində özümün ailə təsərrüfatımı yaratmaq çətin olmayacaq”,- deyə Xaləddin əlavə edib.

Aygün Təbrizli: “Əldə etdiyimiz gəliri təsərrüfatın genişlənməsinə sərf edirik”

Dövlətin göstərdiyi diqqət və hərtərəfli qayğı nəticəsində Cəbrayıl rayonunun Cocuq Mərcanlı kəndi qısa müddətdə müasir və abad bir yaşayış məntəqəsinə çevrilib. 2016-cı ilin aprelində Azərbaycan Milli Ordusunun uğurlu döyüş əməliyyatlarından sonra Lələtəpə yüksəkliyinin azad edilməsi nəticəsində özünün yeni növrağına qovuşan kənddə yerli əhalinin məşğulluğunun artırılması, həmçinin ərazidə kiçik sahibkarlığın genişlənməsi üçün çox iş görülüb. Kənddə yaşayan 25 ailə üçün özünüməşğulluq proqramı çərçivəsində əsasən heyvandarlıq üzrə təsərrüfatlar yaradılıb. Bu, yerli əhalinin məşğulluğunun artırılmasına, həmçinin ərazidə kiçik sahibkarlığın genişlənməsinə imkan verib.

Yeni təsərrüfatlardan biri də Aygün Təbrizliyə məxsusdur. O, əslən Laçın rayonun Aşağı Çorman kəndindəndir, köçkünlük illərində Cocuq Mərcanlı kənd sakini İlkinlə ailə həyatı qurub və Araz çayının sahilində yerləşən kəndə qayıdana qədər Oğuz rayonunun Böyük Söylü kəndində yaşayıblar. Gənc ailə orada da təsərrüfat işləri ilə məşğul olub, mal-davar saxlamaqda İlkinin atası Mahmud kişiyə kömək edib.

İndi isə özlərinin ayrıca heyvandarlıq təsərrüfatları var. Özünüməşğulluq proqramı çərçivəsində onlara iki baş inək verilib. İnəklərin ikisi də bala verib və ailə təsərrüfatı daha da genişlənib. İndi inəklər yenə də bala verməyə hazırlaşırlar.

Aygün Təbrizli deyir: “Təsərrüfat böyüdükcə onun qayğıları da artır. Hələlik inəkləri uzunluğu 10, eni 7 metr olan tövlədə saxlayırıq. Lakin tövləni genişləndirmək, onlara axur yaratmaq barədə düşünürük. Əsas odur ki, əldə etdiyimiz vəsaiti təsərrüfatın özündən qazanırıq. Üç oğlumuz var, onları da bu qayğılara alışdırmağa çalışırıq. İndi bizi ən çox örüş və yem məsələsi narahat edir. Onları həll edə bilsək, təsərrüfatın genişlənməsi üçün heç bir ciddi problem olmayacaq”.

Kiçik sahibkar iki il ərzində qoyun-quzuların sayını 100 başa çatdırıb

Cocuq Mərcanlıda digər bir ailə təsərrüfatı Elnur Həsənova məxsusdur. O, iki il əvvəl özünüməşğulluq proqramına qoşulub. Kəndə gəlib sakinləri həmin proqrama cəlb edən məşğulluq mərkəzinin nümayəndələri sahibkar kimi onu qeydiyyatdan keçirərək 20 ana qoyun və bir erkək veriblər.

Gənc sahibkarın zəhmətkeşliyi, qoyun-quzu saxlamaq qaydalarını yaxşı bilməsi öz bəhrəsini verib. “Qoyunu əbəs yerə bərəkətli heyvan hesab etmirlər. İki il ərzində onların ət, yun, südündən də istifadə etmişik, kəsdiyimiz də, pay verdiyimiz də olub. Bununla belə indi quzularla birlikdə onların sayı 100 başa çatıb. Qoyun-quzuların sayının çoxalması onların yemlə, otlaqla təmin olunması barədə düşünməyə məcbur edir. Tikdiyim tövlə də indi onları bəsləmək üçün darlıq edir. Bu kiçik fermanın məhsullarından əldə etdiyim vəsaitlə onların inkişafı üçün daha əlverişli şərait yaratmağı planlaşdırıram”,- deyə Elnur bildirib.

Füzulidə 241, Cəbrayılda 175, Cocuq Mərcanlıda 25 nəfər özünüməşğulluq proqramına cəlb edilib

Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin mətbuat xidmətinin rəhbəri Əsmər Nəcməddinqızı cəbhəyanı bölgələrdə həyata keçirilən özünüməşğulluq proqramının icrası barədə məlumat verərək deyib: “ Proqramın məqsədi aztəminatlı ailələrin fərdi təsərrüfatlarının yaradılması, dayanıqlı gəlir mənbəyi ilə təmin olunmasıdır. Məşğulluq Proqramlarının icrası zamanı həssas qrupdan olan şəxslər, məcburi köçkünlər, cəbhəboyu bölgədə yaşayan vətəndaşlar daim diqqət mərkəzində saxlanılır, onlar üstün hüquqa malikdirlər. İndiyədək Füzuli rayonu üzrə 691 nəfər işlə təmin edilib, 241 nəfər özünüməşğulluq proqramına cəlb edilib. Bu gün də proqram çərçivəsində özünüməşğulluq proqramı sahəsində yeni istiqamətlər yaradılır. Təkcə 2019-cu ildə Cəbrayıl rayonundan olan 202 nəfər münasib işlə təmin edilib, rayon üzrə özünüməşğulluq proqramına 175 nəfər, Cocuq Mərcanlıdan isə 25 nəfər cəlb edilib”.