Cənub bölgəsinə infotur təşkil olunmuşdur
Lənkəran, 28 iyun (AZƏRTAC). Mədəniyyət və Turizm Nazirliyinin dəstəyi, “Skal İnternational Baku” Turizm Professionalları Assosiasiyasının, “Millenium” turizm şirkətinin və “Xan Lənkəran” mehmanxanasının təşkilatçılığı ilə xarici turistlərin, turizm şirkətləri və media nümayəndələrinin iştirakı ilə cənub bölgəsinə infotur təşkil olunmuşdur.
AZƏRTAC xəbər verir ki, 35 nəfərlik turist dəstəsi iki gün ərzində Lənkəran və Astara rayonlarının müxtəlif tarixi abidələrinə baxmış, təbiətin qoynunda olmuşlar.
“Skal İnternational Baku” Turizm Professionalları Assosiasiyasının rəhbəri Ruslan Quliyev bildirmişdir ki, turun təşkil olunmasında məqsəd bölgənin turizm potensialını dərindən öyrənmək, turizm şirkətlərinə yeni marşrutları təqdim etməkdir.
Bu məqsədlə keçirilən mətbuat konfransında qeyd olunmuşdur ki, cənub bölgəsində rəngarəng turizm marşrutlarının işlənib hazırlanması və müxtəlif turizm növlərinin təbliğ olunması üçün böyük imkanlar vardır. Xüsusən ekoturizmin və müalicə turizminin inkişafı üçün bölgə çox əhəmiyyətlidir.
Lənkəranda “Xan sarayı”, “Dairəvi qala”, Astarada “Yanar bulaq” və “Ləm”lə tanış olan turistlər bu yerlərin tarixi abidələrinin zənginliyinə və təbiətinin rəngarəngliyinə heyran qaldıqlarını bildirmişlər.
Qonaqlar arasında Fransadan və İrandan turistlər də olmuşlar.
Qeyd edək ki, növbəti infoturun Naxçıvana təşkil olunması nəzərdə tutulmuşdur.
Bölmənin digər xəbərləri
