Cənub bölgəsinin sakinləri yanğın zamanı zəruri davranış qaydaları barədə məlumatlandırılıb
Bakı, 26 avqust, AZƏRTAC
Fövqəladə Hallar Nazirliyinin (FHN) Dövlət Yanğın Nəzarəti Xidməti səlahiyyətlərinə uyğun olaraq, yanğın təhlükəsizliyi ilə bağlı əhalinin maarifləndirilməsi məqsədilə silsilə tədbirləri davam etdirir.
Nazirlikdən AZƏRTAC-a bildirilib ki, bu çərçivədə, Lənkəran Tibb Kollecində, Lənkəran şəhər 1 saylı Ailə Sağlamlıq Mərkəzi və Lənkəran şəhər 5 saylı körpələr evi - uşaq bağçasında, Hirkan Milli Parkında, Masallı Regional Meşə Təsərrüfatı Mərkəzinin Yardımlı və Masallı meşəbəyliyində yanğına qarşı maarifləndirmə tədbirləri keçirilib.
Tədbirlərdə yanğınların baş vermə səbəbləri və qarşısının alınması yolları, yanğın zamanı zəruri davranış qaydaları barədə məlumat verilib. Eləcə də ilkin yanğınsöndürmə vasitələrindən istifadə qaydaları əyani şəkildə nümayiş etdirilib, mövzu ilə bağlı geniş müzakirələr aparılıb, zəruri tövsiyələr verilib, suallar cavablandırılıb.
Həmçinin Masallı Regional Meşə Təsərrüfatı Mərkəzinin 23 saylı dolayında, Cəlilabad və Yardımlı meşəbəyliyində yanğından mühafizə məqsədilə şumlama və meşə dolayına yanğın avtomobillərinin sərbəst yanaşması üçün torpaq yolların salınması işləri aparılıb. Bundan başqa, Lənkəran şəhər 20 Yanvar küçəsində, Astara şəhər, 28 May küçəsində, Masallı Regional Meşə Təsərrüfatı Mərkəzinin Masallı meşəbəyliyində isə quru otların, kol-kos və məişət tullantılarının təmizlənməsi təmin olunub.
Bölmənin digər xəbərləri
