“CƏNUB MİRVARİSİ-2009” III FUTBOL ÇEMPİONATININ QRUP MƏRHƏLƏSİNİN OYUNLARI BAŞA ÇATMIŞDIR
Cəlilabad, 23 sentyabr (AZƏRTAC). “Pal-Süd” MMC-nin baş sponsorluğu və Cənub Regional Futbol Federasiyasının təşkilatçılığı ilə 1996-1997-ci il təvəllüdlü yeniyetmələr arasında keçirilən “Cənub mirvarisi-2009” III Futbol Çempionatının qrup mərhələsinin oyunları başa çatmışdır.
Öz qruplarında ilk iki yeri tutan komandalar mübarizəni davam etdirmək hüququ qazanmışlar. “A” qrupunda bu hüquqa 12 xalla birinci yeri tutan Neftçalanın “UGİM” və 7 xalla ikinci yeri tutan Cəlilabadın “UGİM-1” komandası, “B” qrupunda isə 10 xalla ilk iki yeri bölüşən Masallının “Bələdiyyə” və Lənkəranın “Xəzər-92” komandaları sahib olmuşlar.
Oyunlar Cəlilabad şəhərinin mərkəzi stadionunda keçiriləcəkdir.
Püşkatmanın nəticələrinə görə, sentyabrın 26-da “Xəzər-92” “UGİM”-lə, “Bələdiyyə” “UGİM-1” ilə qarşılaşacaqdır. Oktyabrın 4-də isə “Bələdiyyə” ”Xəzər-92”-ni, “UGİM” isə “UGİM-1”-i qəbul edəcəkdir.
Bu mərhələnin son oyunları oktyabrın 11-də keçiriləcəkdir. Həmin gün “UGİM-1” “Xəzər-92”, Neftçalanın “UGİM” komandası isə “Bələdiyyə” ilə qarşılaşacaqdır.
Bölmənin digər xəbərləri
