İQTİSADİYYAT
CƏNUBİ QAFQAZDA QAÇQINLARA VƏ MƏCBURİ KÖÇKÜNLƏRƏ BMT XƏTTİ İLƏ YARDIM GÖSTƏRİLƏCƏK
BMT-nin Qaçqınların İşləri üzrə Ali Komissarlığının (QJAK) Bakı nümayəndəliyindən AZƏRTAC-a bildirmişlər ki, Komissarlıq Cənubi Qafqaz ölkələrində qaçqınlar və məcburi köçkünlər üçün təxminən 9 milyon dollar dəyərində proqramlar həyata keçirmək niyyətindədir.
Proqrama uyğun olaraq, Azərbaycanda xərclərin məbləği 3,1 milyon, Ermənistanda 1,8 milyon, Gürcüstanda isə 4,8 milyon dollar təşkil edəcəkdir.
Bu günlərdə Cenevrədə keçirilmiş illik konfransda donor ölkələr Ali Komissarlığa əlavə olaraq, təxminən 280 milyon dollar ayırmağı öhdələrinə götürmüşlər.
Beləliklə, donor ölkələr bugünədək 2003-cü il üçün Ali Komissarlığa təxminən 315 milyon dollar ayırmışlar ki, bu da onun “Donor ölkələrə qlobal müraciət”ində istənilən məbləğin üçdə biri qədərdir.