Çaylarda sululuq səviyyəsi araşdırılmışdır
Bakı, 25 iyul (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən iyulun 25-də çaylarda araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, Böyük Qafqazın Quba-Xaçmaz bölgəsi çaylarında sululuq ongünlük normanın 95-105, Kiçik Qafqazın çaylarında 95-125, Lənkəran-Astara bölgəsi çaylarında 70-140, Naxçıvan MR çaylarında isə 90 faizini təşkil etmişdir.
Müəyyən edilmişdir ki, son günlərdə hava şəraitinin yağmursuz və isti keçməsi ilə əlaqədar əksər dağ çaylarında sululuq azalmışdır. Kür çayının Qıraqkəsəmən məntəqəsində suyun səviyyəsində 6, Qanıx çayının Əyriçay məntəqəsində isə 9 santimetr azalma müşahidə olunmuşdur.
İyulun 25-dən başlayaraq Kür çayının aşağı axınında suyun səviyyəsində artım qeydə alınmışdır.
Hazırda Kürün Surra məntəqəsində suyun səviyyəsi 386, Şirvanda 261, Salyanda 204, Bankədə 223, Araz çayının Novruzlu məntəqəsində isə 130 santimetrdir.
Bölmənin digər xəbərləri
