Çin iqtisadiyyatı yenə ABŞ-dan sonra dünyada ikinci yerdə qərarlaşıb
Bakı, 6 mart, AZƏRTAC
Ötən ilin nəticələrinə əsasən,12 trilyon dollardan artıq həcmə malik Çin iqtisadiyyatı sürətli inkişaf tempinə baxmayaraq, əvvəlki kimi ABŞ-dan sonra dünyada ikinci yeri tutur.
AZƏRTAC xarici KİV-lərə istinadla xəbər verir ki, bunu Çinin İslahatlar və İnkişaf üzrə Dövlət Komitəsinin rəhbəri He Lifen bildirib.
“Son hesablamalara görə, ötən il Çinin ümumi daxili məhsulunun həcmi 82,7 trilyon yuana, təxminən 12,2 trilyon dollara çatıb. Bu, dünyanın birinci iqtisadiyyatı olan ABŞ-la müqayisədə yenə 7 trilyon dollar azdır. Lakin dünyanın üçüncü iqtisadiyyatı - Yaponiya ilə müqayisədə bizim iqtisadiyyat 7 trilyon dollar çoxdur. Buna görə də, biz əvvəlki kimi dünyanın ikinci iqtisadiyyatına malikik. Bu, elə də asan deyil”, - deyə He Lifen martın 6-da keçirilən mətbuat konfransında qeyd edib.
Onun sözlərinə görə, ötən il Çin iqtisadiyyatı çox ciddi problemlərlə, o cümlədən “qara qu quşları” (nəzərəçarpacaq nəticələrə səbəb olan çətin proqnozlaşdırılan və nadir hadisələr) və “boz kərgədanlarla” (nəzərəçarpacaq nəticələrə səbəb olma ehtimalı yüksək və buna baxmayaraq, əhəmiyyət verilməyən risklər) qarşılaşıb.
Bölmənin digər xəbərləri
