Çin və Hindistan arasında növbəti sərhəd toqquşması
Pekin, 13 dekabr, AZƏRTAC
Çinin və Hindistanın sərhəd qoşunları arasında Himalay dağlarının mübahisəli ərazilərində təxminən 2 illik fasilədən sonra növbəti toqquşma qeydə alınıb.
AZƏRTAC Hindistan mediasına istinadla xəbər verir ki, ölkənin Müdafiə Nazirliyi silahsız toqquşma nəticəsində hər iki tərəfin hərbçiləri arasında yüngül xəsarət alanlar olduğunu açıqlayıb. Hadisə dekabrın 10-da Hindistanın Arunaçal Pradeş ştatının Tavanq adlı sərhəd zonasında baş verib. Məlumata görə Hindistan sərhədçiləri ilə Çin Xalq Azadlıq Ordusunun sərhədçiləri iki ölkə arasında de-fakto sərhəd rolunu oynayan nəzarət xəttində toqquşub. Qısa toqquşmadan sonra hər iki tərəf ərazini dərhal tərk edib və səhra zabitləri sərhəd xəttində sakitliyin bərpası üçün görüş keçiriblər.
Çin tərəfi məsələyə dair rəsmi açıqlama verməyib.
Qeyd edək ki, iki ölkə arasında 3 min 379 kilometr mübahisəli sərhəd xəttinin müxtəlif hissələrində vaxtaşırı silahlı və silahsız qarşıdurmalar qeydə alınıb. Bundan əvvəl sonuncu dəfə 2020-ci ilin iyununda Ladax adlı ərazidəki əlbəyaxa toqquşmada ən azı 20 hindli və 4 çinli sərhədçi ölmüşdü.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
