Çində “Raqasa” tayfunu ilə əlaqədar xəbərdarlıq səviyyəsi ən yuxarı həddə qaldırılıb
Pekin, 23 sentyabr, AZƏRTAC
Cari il Sakit okeanda 18-ci tayfun olan “Raqasa”nın törədə biləcəyi fəsadlar nəzərə alınaraq Çinin Quandon əyalətində xəbərdarlıq səviyyəsi ən yuxarı həddə qaldırılıb.
AZƏRTAC xəbər verir ki, hazırda Cənubi Çin dənizi üzərində olan super güclü “Raqasa” tayfunu saatda 20 kilometr sürətlə qərbə doğru hərəkət edir. Növbəti sutka ərzində tayfunun Quandon əyalətinin mərkəzi və qərb sahillərinə çatacağı, sürəti saatda 55 kilometrə çatacaq külək və yağıntı gətirəcəyi pronozlaşdırılıb. Əyalətin sel, quraqlıq və küləklə mübarizə qərargahı bütün yerli qurumlara, təşkilatlara ən yüksək səviyyədə hazırlıq görmək barədə xəbərdarlıq edib. Bura tədrisin, istehsalın, inşaatın, digər iş fəaliyyətlərinin, ictimai nəqliyyatın hərəkətinin dayandırılması da daxildir.
“Raqasa” cari ildə Sakit okeanda ən güclü qasırğa hesab olunur. Super güclü tayfun kateqoriyasından olan “Raqasa”nın Çinin Quandon, Haynan, Quansi, Fucien əyalətlərində və Tayvan adasında təsirli olacağı güman edilir. Artıq bəzi yaşayış məntəqələrində tayfunun fəsadlarından yayınmaq və ya təsirini azaltmaq üçün qabaqlayıcı işlərə başlanılıb. Quandon əyaləti üzrə elektrik idarələri 32 min nəfərlik təcili yardım qrupu toplayıb. Dənizdə bütün növ fəaliyyət dayandırılıb, Quandon əyaləti üzrə 10 min gəmi təhlükəsiz yerlərə təxliyə edilib. Cuhay və Cianmen şəhərlərində orta məktəblərdə dərslər sentyabrın 23-dən qeyri-müəyyən müddətə dayandırılıb.
Bundan başqa, əyalətdə sürətli və adi qatarların fəaliyyətinə ara verilib. Çinin iqtisadi cəhətdən ən inkişaf etmiş və əhalinin sıx məskunlaşdığı Böyük Körfəz zonası üçün xüsusi əhəmiyyət daşıyan 55 kilometrlik Honkonq-Cuhay-Makao körpü-tuneli də bağlanıb. Çinin xarici ticarət qapısı hesab olunan Quancou şəhərinin “Bayyun” beynəlxalq hava limanında uçuşların ləğvi də gündəlikdə yer alır.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
