Çinli ekspert : Sian limanı Bakıda çeşidləmə və terminal qurğularının genişləndirilməsinə sərmayə qoymağı planlaşdırır
Bakı, 18 sentyabr, AZƏRTAC
Orta Dəhliz hazırkı geosiyasi şəraitdə Asiya ilə Avropa arasındakı tədarük zəncirlərində proqnozlaşdırılma və çevikliyi təmin edən əsas amilə çevrilir.
Bu sözləri AZƏRTAC-a açıqlamasında nəqliyyat və logistika üzrə çinli ekspert, “Beijing Cross-Eurasia International Logistics” şirkətinin idarəedici direktoru Van Syu Dun deyib.
O qeyd edib ki, 2025-ci ilin əvvəlindən Çindən Avropaya gedən 300-dən çox qatar ya Bakıya gəlib, ya da Avropaya hərəkət edərkən Azərbaycan paytaxtından keçib.
Agentliyin həmsöhbəti vurğulayıb ki, bu marşrut Rumıniya və Bolqarıstan kimi şimal istiqamətində Çin-Avropa dəmir yolu dəhlizinin daha az səmərəli xidmət göstərdiyi regionları əhatə edir. Bundan əlavə, dəhliz şimal marşrutundan yan keçməyə üstünlük verən bir sıra Avropa şirkətlərinin ehtiyaclarını ödəyir.
Van Syu Dun Azərbaycanın Asiya ilə Avropanı birləşdirən Orta Dəhlizdə mərkəz və əlaqələndirici kimi mühüm rolunu vurğulayıb. Ekspert izah edib ki, onun şirkəti Azərbaycan Dəmir Yolları (ADY), Bakı Limanı, Alyans və digər tərəfdaşlardan Siandan Bakı vasitəsilə Avropaya yükdaşımalarının təşkilində əhəmiyyətli dəstək alıb.
Sian-Bakı marşrutu ilə hərəkət edən yüklərin Azərbaycan paytaxtından tez-tez qonşu ölkələrə çatdırılma üçün daşındığını və bunun da şəhərin nəqliyyat qovşağı kimi rolunu təsdiqlədiyini qeyd edən ekspert, həmçinin Ələt limanının genişləndirilməsi, çeşidləmə və terminal infrastrukturunun inkişafı ilə Bakının Cənub Dəhlizində əhəmiyyətinin daha da artacağına əminliyini ifadə edib. Onun sözlərinə görə, “Azərbaycan Dəmir Yolları” QSC Qazaxıstan və Gürcüstandan olan tərəfdaşları ilə birlikdə Xəzər-Qafqaz-Qara dəniz seqmentinin sabitliyinin yaxşılaşdırılması istiqamətində fəal işləyir.
Multimodal marşrutun inkişafından danışan Van Syu Dun vurğulayıb ki, Bakı nəqliyyat qovşağı kimi qonşu ölkələrə xidmət göstərməklə yanaşı, həm də Azərbaycan və ona yaxın dövlətlərdən Çinə ixracı stimullaşdırır. O, Azərbaycan ilə Çin arasında ticarət dövriyyəsinin 2024-cü ildə əvvəlki illə müqayisədə 20,7% artdığını göstərən məlumatları diqqətə çatdırıb. Bununla belə, bu müsbət tendensiyaya baxmayaraq, ekspert qeyd edib ki, bütün dəhliz boyu həm “sərt” infrastrukturun – liman və dəmir yolu tutumunun, həm də “yumşaq” infrastrukturun – rəqəmsallaşdırılmasının təkmilləşdirilməsinə təcili ehtiyac var. O, ticarətin asanlaşdırılması üçün gömrük orqanlarının əməkdaşlığı və koordinasiyanı gücləndirəcəyinə ümidvar olduğunu bildirib.
Çinli ekspert, həmçinin Qazaxıstan Dəmir Yolları və Bakı Limanı ilə birlikdə Sian Limanının çeşidləmə və terminal potensialının genişləndirilməsi üzrə Azərbaycan paytaxtına investisiya yatırmaq planları haqqında məlumatı paylaşıb. Sərmayə Bakı Limanına qoyulacaq. AZƏRTAC-ın həmsöhbətinin sözlərinə görə, “Azərbaycan Dəmir Yolları” QSC liman-dəmir yolu idarəçiliyinin səmərəliliyini artırmaq üçün Bakı Limanını ADY ilə fəal şəkildə inteqrasiya edir. ADY və Bakı Limanı artıq Xəzər dənizi üzərindən səmərəli daşımaların təmin edilməsinə yönəlmiş bir sıra müsbət addımlar atır.
Van Syu Dun söhbətin sonunda əmin olduğunu bildirib ki, Orta Dəhliz Asiya ilə Avropa arasında təchizat zəncirlərini daha sabit və ekoloji cəhətdən təmiz edəcək. Onun sözlərinə görə, şirkət Azərbaycan və bütün tərəfdaşları ilə birlikdə yüklərin çatdırılmasının vaxtında, şəffaf və maliyyə cəhətdən etibarlı olmasını təmin etmək, bununla da marşrutun bütün potensialını reallaşdırmaq, çatdırılma müddətlərini və xərclərini yaxşılaşdırmaq və optimallaşdırmaq istiqamətində çalışır.
Bölmənin digər xəbərləri
