DÜNYA
Çinlilər Nankin qırğını qurbanlarının xatirəsini anır
Pekin, 13 dekabr, AZƏRTAC
Çinin Nankin şəhərində yapon istilası dövründə 1937-ci ildə törədilmiş qırğınlarda ölənlərin xatirəsi anılıb.
AZƏRTAC xəbər verir ki, Çinin ovaxtkı paytaxtı olan Nankində baş verən hadisələrin 85-ci ildönümü ilə əlaqədar anım mərasimi keçirilib. Nankin qırğını qurbanlarının xatirə muzeyinin qarşısında keçirilən tədbirdə dövlət rəsmiləri, ictimaiyyət nümayəndələri, qırğın qurbanlarının yaxınları iştirak ediblər. Yerli vaxtla saat 10:01-də bir dəqiqəlik sükut elan edilib. Çinin müxtəlif şəhərlərində də oxşar mərasimlər keçirilib.
Nankin qırğınından sağ qalmış cəmi 54 nəfər hazırda həyatdadır.
Qeyd edək ki, Çin tərəfinin məlumatına əsasən, yapon ordusunun Nankində 1937-ci il dekabrın 13-dən yanvarın sonunadək törətdiyi qırğınlarda 300 mindən çox dinc sakin və silahsız əsgər öldürülüb. Rəsmi Tokio Nankində törədilən qırğınları təsdiq etsə də, həlak olanların sayı barədə məlumatların dəqiq olmadığını və bununla bağlı müxtəlif fikirlərin mövcudluğunu bildirir.
Çinin ali qanunverici orqanı olan Xalq Nümayəndələri Yığıncağının 2014-cü ildə qəbul etdiyi qərarla hər il 13 dekabr tarixi Çində Nankin qırğını qurbanlarının xatirəsinin anım günü kimi qeyd edilir.
Şahin Cəfərov
AZƏRTAC-ın xüsusi müxbiri
Pekin