Dağ çaylarında sahilbərkitmə işləri davam etdirilir
Zaqatala, 9 avqust (AZƏRTAC). Zaqatala rayonunun yaşayış məntəqələrini və əkin sahələrini baş verə biləcək sel təhlükəsindən qorumaq məqsədi ilə rayon ərazisindən axan dağ çaylarında sahilbərkitmə işləri davam etdirilir.
Rayon icra hakimiyyətindən AZƏRTAC-a bildirmişlər ki, cari ilin ötən dövrü ərzində dövlət vəsaiti hesabına Katex çayının sol sahilində 200 metr, Tala çayında isə 100 metr uzunluğunda daş-beton bəndin tikintisi aparılmış, Muxax çayında 370 kubmetr həcmdə qabion bəndlər quraşdırılmışdır. Bundan əlavə, 4 min kubmetr həcmində daş-beton bəndlər təmir edilmiş, 595 min kubmetr həcmdə çay yataqları təmizlənmişdir.
Cari ildə rayon ərazisində torpaqların sel sularından mühafizə edilməsinə, suvarma şəbəkəsinin təmiri və əhatə dairəsinin genişləndirilməsinə, suvarma suyundan səmərəli istifadə edilməsinə diqqət daha da artırılmışdır. “Meliorasiya və Su Təsərrüfatı” ASC tərəfindən 4 subartezian quyusu əsaslı təmir edilmiş, 2100 hektar əkin sahəsinin suvarılmasına xidmət edən ikipilləli Alazan nasos stansiyasında təmir-bərpa işləri davam etdirilmişdir. Eyni zamanda, 145 min kubmetr həcmində suvarma kanalları lildən təmizlənmiş, 25 hidrotexniki qurğu təmir edilmiş, əlavə olaraq 3 yeni hidrotexniki qurğu tikilmişdir.
Bölmənin digər xəbərləri
