SİYASƏT
DAK AZƏRBAYCAN NÜMAYƏNDƏLİYİNİN I KONFRANSI KEÇİRİLƏCƏKDİR
AZƏRTAC xəbər verir ki, aprelin 30-da “Ambassador” hotelində Dünya Azərbaycanlıları Konqresi (DAK) Azərbaycan Nümayəndəliyinin I konfransı keçiriləcəkdir.
DAK-ın mətbuat xidmətindən bildirmişlər ki, konfransda Nümayəndəliyin sədrinin hesabatı dinləniləcək, X Qurultaya nümayəndələr seçiləcəkdir.
DAK-ın X qurultayı mayın 23-dən 25-dək Almaniyanın Köln şəhərində keçiriləcəkdir. Tədbirdə təşkilatın müxtəlif bölmələrinin hesabatları dinləniləcək, DAK idarə heyəti səsvermə yolu ilə yenidən formalaşdırılacaqdır. İdarə heyəti də özünün ilk iclasını keçirərək DAK-ın sədrini seçəcəkdir. Təşkilatın Nizamnaməsinə əlavə və dəyişikliklərin edilməsi də gözlənilir.
Qurultayın bir günü Azərbaycan Demokratik Cümhuriyyətinin 90 illik yubileyinə həsr olunacaqdır. 1918-ci il mayın 28-də Cümhuriyyətin əsasını qoymuş dəyərli ziyalılarımızın həyat və fəaliyyəti barədə məruzələr dinləniləcəkdir.