SİYASƏT
Daşkənddə Azərbaycanın və Özbəkistanın müstəqilliklərinin 23-cü ildönümü qeyd edilib
Daşkənddəki “Türküstan” sarayında Azərbaycanın və Özbəkistanın müstəqilliklərinin 23-cü ildönümü ilə bağlı bayram tədbiri keçirilib.
Azərbaycanın Özbəkistandakı səfirliyi və səfirliyin nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə keçirilən tədbirdə Özbəkistandakı səfirlər, ədəbiyyat, mədəniyyət və incəsənət xadimləri, ictimaiyyətin nümayəndələri, diasporumuzun üzvləri, jurnalistlər iştirak ediblər.
Sarayın foyesində ulu öndər Heydər Əliyevin həyat və fəaliyyəti, Azərbaycan Prezidenti İlham Əliyevin rəhbərliyi ilə ölkəmizdə həyata keçirilən layihələr, tariximiz, mədəniyyətimizlə bağlı kitablar, milli musiqi alətləri, suvenirlər nümayiş etdirilib.
Hər iki ölkənin dövlət himni səsləndirildikdən sonra səfir Hüseyn Quliyev çıxış edərək 18 oktyabr - Azərbaycanın Dövlət Müstəqilliyi Günü haqqında məlumat verib. Səfir bildirib ki, Azərbaycan xalqı XX əsrdə iki dəfə müstəqillik əldə edib. Əsrin əvvəllərində -1918-ci ildə Şərqdə ilk demokratik dövlət olan Azərbaycan Xalq Cümhuriyyəti yarandı. Təəssüf ki, bu dövlət cəmi 23 ay yaşadı. Əsrin sonunda isə xalqımız yenidən öz müstəqilliyini əldə etdi. Azərbaycan Respublikası Ali Sovetinin 1991-ci il oktyabrın 18-də keçirilmiş tarixi sessiyasında Azərbaycan Respublikasının dövlət müstəqilliyi haqqında Konstitusiya Aktı yekdilliklə qəbul edildi. Həmin il dekabrın 29-da ümumxalq səsverməsi keçirildi və xalqımız dövlət müstəqilliyinin lehinə səs verdi.
“Azərbaycanın və Özbəkistanın dövlət müstəqilliyi xalqlarımızın tarixi uğurudur”, - deyən səfir bildirib ki, bunu qorumaq hər birimizin müqəddəs borcudur. Diplomat ölkələrimiz arasındakı əməkdaşlığın inkişaf səviyyəsi haqqında da söhbət açıb.
Daşkənddəki Beynəlmiləl Mədəniyyət Mərkəzinin sədri Nəsrəddin Məhəmmədiyev bayram münasibətilə mərasim iştirakçılarını təbrik edib, Azərbaycan ilə Özbəkistan arasında əlaqələrin inkişafından söz açıb. O deyib ki, özbək xalqı böyük Azərbaycan şairləri Nizami Gəncəvi, İmadəddin Nəsimi, Məhəmməd Füzuli və digər söz sərraflarını çox sevir. Onların qəzəlləri üstündə oxunan muğamlar bu ölkədə çox bəyənilir.
Azərbaycan Mədəniyyət Mərkəzinin sədri Mobil Məmmədov bildirib ki, Özbəkistanda təxminən 60 min soydaşımız yaşayır və ölkə qanunları ilə onların hüquq və azadlıqları təmin olunub. Soydaşlarımız Özbəkistan iqtisadiyyatının müxtəlif sahələrində uğurla fəaliyyət göstərirlər.
Tədbir konsert proqramı ilə davam edib.
Qulu Kəngərli
AZƏRTAC-ın xüsusi müxbiri
Daşkənd