DAŞKƏNDDƏKİ DİASPORUMUZUN ÜZVLƏRİ NOVRUZ BAYRAMINI QEYD ETMİŞLƏR
AZƏRTAC-ın xüsusi müxbiri xəbər verir ki, Daşkənddəki Babur adına parkda paytaxtdakı milli mədəniyyət mərkəzlərinin böyük bayram şənliyi keçirilmişdir.
Parka toplaşanları Özbəkistan Baş nazirinin müavini Svetlana İnamova və Beynəlmiləl Mədəniyyət Mərkəzinin sədri Nəsrəddin Məhəmmədiyev salamlamış, ölkədə yaşayan azsaylı xalqlara yaradılan şəraitdən danışmışlar.
Azərbaycan Mədəniyyət Mərkəzləri Assosiasiyasının Axıska Türkləri Mədəniyyət Dərnəyi ilə birgə təşkil etdikləri pavilyona gələnlər milli mətbəximizin və şirniyyatlarımızın dadına baxmışlar.
“Azəri qızları” rəqs və yeni yaradılmış “Vətən” xalq çalğı alətləri ansambllarının üzvləri mahnı və rəqslərimizi ifa etmiş, assosiasiyanın aktiv üzvlərinə fəxri fərmanlar və qiymətli hədiyyələr verilmişdir.
Assosiasiyanın icraçı direktoru Firdovsi Hüseynov bildirmişdir ki, bayram günlərində 25 imkansız azərbaycanlı ailəsinə və paytdaxtdakı bir neçə uşaq evinə bayram payı göndərilmişdir.
Bölmənin digər xəbərləri
