SİYASƏT
DAŞKƏNDDƏKİ SƏFİRLİYİMİZDƏ NOVRUZ BAYRAMI TƏNTƏNƏLİ ŞƏKİLDƏ QEYD EDİLMİŞDİR
AZƏRTAC-ın xüsusi müxbiri xəbər verir ki, Azərbaycanın Özbəkistandakı səfirliyində Novruz bayramı münasibətilə böyük şənlik keçirilmişdir.
Tədbirdə Özbəkistan Xarici İşlər Nazirliyinin, Türkiyənin bu ölkədəki səfirliyinin əməkdaşları, Daşkənddəki Azərbaycan diaspor təşkilatının üzvləri, qardaş özbək xalqının nümayəndələri, jurnalistlər iştirak etmişlər.
Ölkəmizin Özbəkistandakı səfiri Namiq Abbasov Novruz bayramı münasibətilə Azərbaycan Prezidenti İlham Əliyevin xalqımıza təbrikini oxumuş, bu bayramın həyatımızdakı və məişətimizdəki rolundan danışmışdır.
Sonra söz musiqiyə verilmişdir. Yusif Əliyev, Səbuhi Əhmədov, Aynurə Abdullayeva və özbək müğənnisi İsrail Səidumarov xalq mahnısı, muğam və təsniflərimizi, İlham Abdullayev sazda qədim el havalarını ifa etmişlər.
Şənlikdə Novruzla bağlı azyaşlı uşaqlar arasında keçirilmiş inşa müsabiqəsinin qaliblərinə, həmçinin ən yaxşı rəqs edən uşaqlara qiymətli hədiyyələr verilmişdir.
Bildirilmişdir ki, diasporumuzun imkanlı üzvlərinin maliyyə dəstəyi ilə Daşkənddə yaşayan 40 imkansız ailəyə bayram payı göndərilmiş, səfirlik tərəfindən isə diasporumuzun beş aktiv üzvünə Azərbaycan televiziya kanallarına baxmaq üçün peyk antenaları hədiyyə edilmişdir. İlin sonunadək daha 10 ailəyə peyk antenaları veriləcəkdir.
Bayram süfrəsi arxasında keçən şənlik bir neçə saat davam etmişdir.