Bakı, 16 yanvar, AZƏRTAC

Xəbər verdiyimiz kimi, yanvarın 16-da Birləşmiş Ərəb Əmirliklərində (BƏƏ) Əbu-Dabi Dayanıqlılıq Həftəsi (ADSW) start götürüb. Əbu-Dabi Dayanıqlılıq Həftəsi dayanıqlı inkişafı sürətləndirmək və iqtisadi, sosial və ekoloji tərəqqiyə nail olmaq üçün BƏƏ və onun təmiz enerji şirkəti “Masdar” tərəfindən dəstəklənən qlobal təşəbbüsdür. Bu, dünyanın dayanıqlılıq üzrə ən aparıcı tədbirlərindən biri hesab olunur.

Azərbaycan Prezidenti İlham Əliyevin Əbu-Dabi Dayanıqlılıq Həftəsinə dəvət olunması xüsusi əhəmiyyət kəsb edir. Çünki Azərbaycan Respublikası 2015-ci ildə BMT-nin Dayanıqlı İnkişaf Sammitində təşkilatın “Dayanıqlı İnkişaf üzrə 2030 Gündəliyi”ni təsdiqləyib və bununla Dayanıqlı İnkişaf Məqsədlərinin həyata keçirilməsi üzrə qlobal səylərə qoşulub. Ölkəmizin dayanıqlı inkişaf sahəsində yüksək nəticələri BMT-nin illik Dayanıqlı İnkişaf Hesabatlarında mütəmadi olaraq öz əksini tapır.

Prezident İlham Əliyevin belə mühüm tədbirə - Əbu-Dabi Dayanıqlılıq Həftəsinə dəvət olunmasını AZƏRTAC-a şərh edən siyasi ekspert Elçin Mirzəbəylinin sözlərinə görə, BƏƏ-ni Azərbaycan üçün cazibədar edən amillərdən biri də sözügedən ölkənin iqtisadi inkişaf modeli ilə Azərbaycanda həyata keçirilən iqtisadi islahatların mahiyyətinin uzlaşması, logistika, yaşıl enerji, enerji və nəqliyyat dəhlizlərinin diversifikasiyası istiqamətində gerçəkləşdirilən layihələr arasında paralellərin olmasıdır.

Siyasi ekspert diqqətə çatdırıb ki, Əbu-Dabidə keçirilən Davamlılıq Həftəsi bu ilin noyabr-dekabr aylarında BMT-nin İqlim Dəyişikliyi üzrə Çərçivə Konvensiyasının 28-ci Tərəflər Konfransı (COP28) ərəfəsində davamlı inkişafın əsas prioritetlərinə yönəlmiş bir sıra yüksək səviyyəli sessiyaları əhatə edir. Bu xüsusda, Prezident İlham Əliyevin sözügedən tədbirə dəvət alması, qlobal əhəmiyyət kəsb edən istiqamətləri əhatə edən məsələlərlə bağlı nitq söyləməsi, şübhəsiz ki, dövlətimizin başçısına, bütövlükdə isə ölkəmizə olan yüksək etimadlı münasibətin növbəti göstəricisi kimi qiymətləndirilməlidir.

“BƏƏ şirkətlərinin Azərbaycana yatırdıqları investisiyalar artmaqdadır və hazırda iki ölkə arasında yaşıl enerji sahəsində çoxmilyardlı layihələrin həyata keçirilməsi üzərində iş gedir. Şübhəsiz ki, qarşılıqlı münasibətlərinin mövcud səviyyəyə yüksəlməsində Prezident İlham Əliyevin BƏƏ də daxil olmaqla Ərəb Liqasına üzv ölkələrlə əlaqələrin genişləndirilməsi istiqamətində həyata keçirdiyi siyasətin müstəsna rolu var. Şübhəsiz, Azərbaycan Prezidentinin BƏƏ-yə işgüzar səfəri qarşılıqlı əlaqələrə böyük töhfə verəcək, ölkəmizə sərmayələrin cəlb edilməsi istiqamətində atılan addımları daha da sürətləndirəcək”, - deyə E.Mirzəbəyli qeyd edib

Ölkələrimiz arasında qarşılıqlı investisiya yatırımlarının, ticari əlaqələrin genişlənməsinin həm iqtisadi, həm də siyasi baxımdan tərəflərə yeni dividendlər qazandırdığını diqqətə çatdıran “Trend” Beynəlxalq İnformasiya Agentliyinin baş direktorunun müavini, siyasi şərhçi Sahil Kərimli deyib: “Azərbaycan və Birləşmiş Ərəb Əmirlikləri bütün beynəlxalq platformalarda bir-birinin maraqlarını müdafiə edir, ortaq mövqe sərgiləyirlər. Bu da çox önəmli amildir. Görüş zamanı Azərbaycan və BƏƏ prezidentlərinin qarşılıqlı hörmət və ehtirama əsaslanan bəyanatları əlbəttə ki, məmnunluq yaradır. Əminliklə demək olar ki, Prezident İlham Əliyevin BƏƏ-yə səfəri iqtisadi sahədə əməkdaşlığın dinamikasını artıracaq. Burada əsas prioritet istiqamət alternativ enerji mənbələri üzərində iş və yaşıl enerji layihələrinin icrasıdır”.

Sahil Kərimlinin sözlərinə görə, BƏƏ-nin nüfuzlu “Masdar” şirkəti ilə müştərək layihələrin perspektivi böyükdür. Bu layihələrlə Azərbaycan dünya enerji bazarında öz rolunu və yerini daha da möhkəmləndirəcək, böyük gəlirlər əldə edəcək.

“İnformasiya Təşəbbüslərinə Dəstək” İctimai Birliyinin sədri Cəsarət Hüseynzadə də öz növbəsində, Azərbaycan Prezidentinin Birləşmiş Ərəb Əmirliklərinə səfərini və Əbu-Dabi Dayanıqlılıq Həftəsində iştirakını siyasi, iqtisadi maraqlarımızın təmin olunması istiqamətində mühüm addım adlandırıb. O deyib: “Sevindirici haldır ki, son dövrlər Birləşmiş Ərəb Əmirlikləri ilə ikitərəfli münasibətlər strateji tərəfdaşlıq mərhələsinə qədəm qoyub. Birləşmiş Ərəb Əmirlikləri bir çox platformalarda Azərbaycanın haqq işinə öz dəstəyini ifadə edib. Əlbəttə ki, bu, Azərbaycanın uzun müddət aparılan uğurlu xarici siyasətinin nəticəsidir”.

Birləşmiş Ərəb Əmirliklərinin siyasi və iqtisadi gücünün hər kəsə məlum olduğunu vurğulayan C.Hüseynzadə əlavə edib: “Azərbaycan özünün gücünü təkcə siyasi formatda deyil, eyni zamanda, iqtisadi sferada da göstərir. Müstəqil siyasət aparmaq üçün dövlətin iqtisadi gücünün artırılması vacib şərtdir. Ölkəmiz iqtisadi gücünü artırmaq üçün dayanıqlı və texnoloji inkişaf modellərindən istifadə edir. Azərbaycan artıq yaşıl enerji ixracatçısı kimi yeni bir istiqamət üzrə hərəkətdədir. Əbu-Dabi Dayanıqlılıq Həftəsi statusuna və təqdimat imkanlarına görə Azərbaycanın yaşıl enerji imkanlarının nümayiş olunması üçün mühüm platformadır”.

Politoloq Tural Əliyevin sözlərinə görə, Prezident İlham Əliyevin Əbu-Dabi şəhərində dünyanın nüfuzlu elm adamlarının, sahibkarların da qatıldığı Dayanıqlılıq Həftəsinin rəsmi açılış mərasimində çıxışı Azərbaycan-BƏƏ münasibətlərində daha bir yeni səhifə açacaq. BƏƏ Azərbaycanın Qarabağ və Şərqi Zəngəzur iqtisadi rayonlarında quruculuq-bərpa işlərində, infrastruktur layihələrində aktiv iştirak etmək istəyən dövlətlərdən sayılır. Azərbaycanın Energetika Nazirliyi ilə BƏƏ-nin “Masdar” şirkəti arasında imzalanan anlaşma memorandumu bərpaolunan və təmiz enerji sahəsində əməkdaşlıq, Azərbaycanın işğaldan azad olunmuş ərazilərində “yaşıl enerjinin” tətbiqini özündə ehtiva edən investisiya imkanlarını nəzərdə tutur. Belə bir mötəbər şirkətin Azərbaycana maraq göstərməsinin təməlində təkcə ikitərəfli münasibətlərin yüksək olması deyil, Azərbaycanın postmüharibə dövründə artan nüfuzu, “sabitlik adasına” çevrilməsi və biznes mühitinin böyük şirkətlər üçün cəlbedici olması faktorları da müstəsna rol oynayır.