Bakı, 18 fevral, AZƏRTAC

Fevralın 7-də ölkəmizdə keçirilən prezident seçkilərində xalqımız öz iradəsini ifadə edərək dövlətimizin başçısı İlham Əliyevə inam və etimadını bir daha təsdiqlədi. Bununla da müasir müstəqil Azərbaycanın tarixində yeni mərhələyə start verildi. Prezident İlham Əliyev fevralın 14-də andiçmə mərasimində çıxışı zamanı qarşıda dayanan vəzifələr və hədəflərdən ətraflı bəhs etdi.

Bu fikirləri AZƏRTAC-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Prezident İlham Əliyevin 20 illik fəaliyyətinin zirvəsində ölkəmizin ərazi bütövlüyünün və suverenliyinin bərpasının dayandığını vurğulayan deputat bildirib ki, bu tarixi nailiyyətə məhz xalqımızın birliyi və dövlətimizin başçısına sonsuz inam sayəsində nail olunub. Hazırda Azərbaycan Cənubi Qafqazda sülhün təmin olunması istiqamətində təşəbbüslər göstərir. Lakin Ermənistan öz havadarlarının təhriki ilə prosesi uzadır. Müəyyən beynəlxalq dairələr bu məsələ ətrafında spekulyasiya etməkdə maraqlıdır. Ona görə də Prezident İlham Əliyev haqlı olaraq vurğuladı ki, Azərbaycan-Ermənistan münasibətlərinin normallaşması prosesi beynəlxalq gündəlikdən düşməlidir. Çünki yerindən duran bu məsələ ilə məşğul olmaq istəyir. Amma biz öz məsələmizi həll etmişik. Ermənistanın havadarlarının pozuculuq fəaliyyəti isə bundan sonra da fiaskoya uğrayacaq. Prezident İlham Əliyevin “Xankəndidə qutuya atdığım bülleten erməni separatçılarının tabutuna vurulan son mismar idi” fikri Ermənistana və onun havadarlarına konkret mesaj oldu.

Azərbaycanın müstəqil siyasi kurs həyata keçirdiyini bildirən deputat qeyd edib ki, ölkəmizin reallaşdırdığı siyasət sırf müstəqillik və suverenlik kimi fundamental prinsiplərə əsaslanır. Biz müttəfiqlərimizi özümüz seçirik. Prezident İlham Əliyev andiçmə mərasimindəki nitqində ölkəmizin xarici siyasət kursu ilə bağlı strateji seçiminə bir daha diqqət çəkdi. Azərbaycanın çoxvektorlu xarici siyasət kursunun əsas mahiyyəti ondan ibarətdir ki, burada milli maraqlar əsas götürülür, eyni zamanda, tərəfdaşlara böyük hörmət bəslənilir və onlarla qarşılıqlı maraqlar əsasında sıx əməkdaşlıq qurulur. Belə effektiv siyasətin nəticəsidir ki, hazırda respublikamıza və onun Lideri İlham Əliyevə həm yerləşdiyi coğrafiyada, həm də uzaq xaricdə böyük hörmət bəslənilir. Azərbaycan Rusiya, Gürcüstan, Türkiyə, İran və Ermənistanla quru sərhədlərinə malikdir. Mərkəzi Asiyadakı ayrı-ayrı ölkələrlə isə bizi Xəzər dənizi birləşdirir. Ölkəmizin qonşuluq siyasəti səmimilik, xoş niyyət və beynəlxalq hüququn normalarına əsaslanır. Respublikamızın hansısa qonşu dövlətlə münaqişəyə girmək, ərazi iddiaları ilə çıxış etmək kimi bir niyyəti yoxdur.

Ölkəmizin beynəlxalq aləmdə qazandığı uğurlara, nüfuzunun artmasına toxunan S.Fətəliyeva deyib: “Ölkəmizin Qoşulmama Hərəkatına sədrliyi kifayət qədər uğurlu oldu və qurumun nüfuzunu, funksionallığını əhəmiyyətli dərəcədə artırdı. Dünya birliyinin BMT-nin ən genişmiqyaslı tədbirlərindən sayılan COP29 Konfransının Azərbaycanda keçirilməsi ilə bağlı qərar qəbul etməsi beynəlxalq səviyyədə ölkəmizə inamın artmasının daha bir ifadəsidir. Ölkəmiz mühüm ekoloji çağırışların, yaşıl enerji gündəliyinin müzakirə olunacağı bu tədbirə də yüksək səviyyədə ev sahibliyi etmək əzmindədir. Artıq cari ilin ikinci yarısında baş tutacaq tədbirə hazırlıq proseslərinə başlanıb və tədbirlər planı uğurla reallaşdırılır”.

Deputat qeyd edib ki, Prezident İlham Əliyevin yeni dövrdə ölkəmizin xarici siyasət kursunun prioritet istiqamətlərindən biri kimi Türk dövlətləri ilə inteqrasiyanın dərinləşdirilməsinin zəruriliyini önə çəkməsi heç də təsadüfi deyil.

“Beləliklə, qarşıdakı dövrü üçün xarici siyasətimizin yeni hədəfləri var. Azərbaycan Prezident İlham Əliyevin liderliyi ilə bu hədəflərə də çatacaq!”, - deyə S.Fətəliyeva əminliklə söyləyib.