Bakı, 18 iyul, AZƏRTAC

Dünyada yaşanan geosiyasi proseslər və qlobal iqtisadi gərginliyə rəğmən, son altı ay ərzində Azərbaycanda bütün sahələrdə müsbət inkişaf tendensiya qeydə alınıb. Belə ki, cari ilin ilk altı ayının nəticələri deməyə əsas verir ki, ölkəmiz uğurla inkişaf edir, bütün istiqamətlər üzrə qarşıya qoyulan vəzifələr icra edilir. Prezident İlham Əliyev iyulun 15-də altı ayının yekunlarına həsr olunan müşavirədə çıxışı zamanı görülmüş işlər, əldə olunan nəticələr haqqında geniş məlumat verdi, həmçinin qarşıda dayanan vəzifələri müəyyənləşdirdi. Ölkəmizin başçısının həyata keçirdiyi düşünülmüş daxili və xarici siyasət nəticəsində uğurla inkişaf edən Azərbaycan bu gün yüksək beynəlxalq nüfuz sahibinə çevrilib. Azərbaycanın beynəlxalq arenada oynadığı rol, göstərdiyi həmrəylik və ehtiyac içində olan ölkələr üçün verilən humanitar, maliyyə dəstəyi, xüsusilə COVID-lə bağlı 80-dən çox ölkəyə göstərilən dəstək ölkəmizin beynəlxalq nüfuzunu böyük dərəcədə artırıb. Bundan əlavə, ölkəmizin beynəlxalq təşkilat və təsisatlarda əsas ölkələrdən biri olaraq çıxış etməsi bu deyilənlərə bariz nümunədir. Bu sırada Qoşulmama Hərəkatındakı uğurlar xüsusi olaraq qeyd olunmalıdır. Azərbaycanın sədrlik müddətinin 2023-cü ilə qədər uzadılması onu göstərir ki, ölkəmiz 120 ölkə arasında çox böyük nüfuz qazanıb və ölkəmizə olan inam bu illər ərzində daha da artıb. Azərbaycan Qoşulmama Hərəkatının institusional inkişafına böyük töhfə vermiş ölkədir. Önəmli addımlardan biri də Qoşulmama Hərəkatının Parlament Şəbəkəsinin yaradılması və Parlament Şəbəkəsinin Bakı konfransının təşkil edilməsi oldu.

Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov bildirib.

“Dövlətimizin başçısı ölkəmizin Avropa İttifaqı, Türk Dövlətləri Təşkilatı, eyni zamanda qonşu ölkələrlə olan münasibətləri haqqında da məlumat verərək əməkdaşlıqların yüksək səviyyədə olduğunu qeyd etdi. Azərbaycan Türk Dövlətləri Təşkilatı çərçivəsində hər zaman fəallıq göstərir və Türk dövlətləri ilə əlaqələrin inkişafı ölkəmiz üçün prioritet məsələlərdən biridir. Avropa İttifaqı-Azərbaycan əlaqələrinin gələcək inkişafı ilə bağlı geniş müzakirələr aparıldığını bildirən Prezident İlham Əliyev yaxın günlərdə Avropa İttifaqı ilə Azərbaycan arasında önəmli sənədin - enerji təhlükəsizliyi ilə bağlı sənədin imzalanacağını və bununla da əməkdaşlığın daha yüksək səviyyəyə yüksələcəyini bildirdi.

Son dövrlər ərzində Amerika-Azərbaycan əlaqələrinin inkişafı istiqamətində də önəmli addımlar atılmış, yüksək vəzifəli şəxslərin qarşılıqlı səfərləri təşkil edilib. ABŞ-ın Prezidenti Co Baydenin Azərbaycan Prezidentinə iki dəfə - həm Müstəqillik Günü ilə bağlı, həm də Bakı Enerji Həftəsinin açılışı ilə bağlı məktub göndərib. Bu, Amerika-Azərbaycan əlaqələrin böyük tarixə malik olmasından, həmçinin əlaqələrin gözəl gələcəyindən xəbər verir.

Müşavirədə Prezident İlham Əliyev Azərbaycan-Ermənistan əlaqələrinin normallaşdırılması məsələsinə diqqət çəkərək cari ilin altı ayında bu istiqamətdə müəyyən addımların atıldığını, lakin hələlik real nəticələrin olmadığını diqqətə çatdırdı. 10 noyabr Bəyannaməsi faktiki olaraq Ermənistanın kapitulyasiya aktıdır. Bununla da Ermənistan müharibədə məğlub edilmiş tərəf kimi öz üzərinə öhdəliklər götürüb. Sənədə əsasən Azərbaycanın əsas hissəsi ilə Naxçıvan Muxtar Respublikası arasında birbaşa əlaqə qurulmalı idi, ancaq bu günə qədər bu imkan yaradılmayıb. Hətta Zəngəzur dəhlizinin Mehri hissəsində tikiləcək dəmir yolunun texniki-iqtisadi əsaslandırılması da yoxdur. Texniki-iqtisadi əsaslandırma olmadan heç bir layihə icra edilə bilməz”, - deyə C.Osmanov qeyd edib.

Deputat bildirib ki, Prezident İlham Əliyev öz çıxışında Ermənistana bir sıra ciddi xəbərdarlıqlar da etdi. Son vaxtlar Ermənistan rəhbərinin yenə də hansısa status haqqında danışmağa başlamasının bu ölkə üçün çox təhlükəli məsələ olduğunu bəyan edən ölkə başçısı artıq Minsk qrupuna da ehtiyac olmadığını vurğuladı. Müşavirədə Prezident, Müzəffər Ali Baş Komandan İlham Əliyevin toxunduğu mühüm məsələlərdən biri də hərbçilərin sosial müdafiəsi və müharibədə qəhrəmanlıq göstərmiş hərbçilərin sosial problemlərinin daim diqqət mərkəzində saxlanılması istiqamətində həyata keçirilmiş tədbirlər oldu. Ümumiyyətlə, hərbçilərin sosial müdafiəsi məsələləri ölkəmizdə yüksək səviyyədə təmin edilir. Qüsursuz xidmət edən hərbçilərə dövlət tərəfindən mənzillər verilir. Bütün hərbi şəhərciklər əsaslı şəkildə təmir edilir. O cümlədən azad edilmiş torpaqlarda hərbi şəhərciklər, bazalar, hərbi təyinatlı yollar, bir sözlə, lazımi infrastruktur yaradılır. Müharibədə qəhrəmanlıq göstərmiş hərbçilərin sosial problemləri də daim diqqət mərkəzindədir. Müharibədə əlil olmuş demək olar ki, bütün hərbçilər artıq ən müasir - dördüncü nəsil protezlərlə təmin olunublar. Ölkəmizin başçısı çıxışında bir daha bildirdi ki, öz sağlamlığını itirmiş hərbçilər dövlət tərəfindən daim qayğı ilə əhatə olunmalıdırlar. Dövlət bunu edir və yerlərdə məmurlar da bunu heç vaxt unutmamalıdırlar.

“Dövlətimizin şəhid ailələri və müharibə əlillərinə olan diqqət-qayğısı hərtərəfli, eyni zamanda davamlıdır. Belə ki, müharibədən sonra bir çox şəhid ailələrinə və müharibə əlillərinə dövlət tərəfindən mənzillər verilib. Yaxın müddətdə Bakı şəhərində bu məsələ artıq tam həll olunacaq. Keçən il 3 min, bu il isə 1500 mənzil və fərdi ev verilib. Bütövlükdə, Birinci və İkinci Qarabağ müharibələrinin şəhid ailələrinə və müharibə əlillərinə 12 min 500 mənzil verilib. Bundan əlavə, reabilitasiya mərkəzləri yaradılmış və həmin mərkəzlər ən müasir texnologiyalarla təchiz edilib. Müharibə əlilləri, veteranlar, şəhid ailələri üçün məşğulluq marafonları keçirilir. Ümumiyyətlə, bu kateqoriyadan olan insanları fəal işə cəlb etmək üçün böyük işlər görülür. Bütün bu işlərlə bərabər Azərbaycan dövləti Qarabağı və Zəngəzuru yenidən qurur. Özü də heç bir yerdən, heç kimdən yardım almadan bu işlər həyata keçirilir, şəhərlər, kəndlər yenidən qurulur. Dövlətimizin həyata keçirdiyi bu misilsiz işlər isə iqtisadi müstəqilliyinin nəticəsidir. İnkişaf üçün iqtisadi müstəqillik əsas amillərdən biridir. İqtisadi müstəqillik, həmçinin siyasi müstəqilliyi təmin edir. Müstəqil iqtisadi və siyasi siyasət yürüdən Azərbaycanın iradəsinə bu gün heç kim təsir edə bilməz, heç kim ölkəmizə heç nəyi diktə edə bilməz. Həyata keçirilən düşünülmüş siyasət ölkəmizin iqtisadi imkanlarını da davamlı olaraq artırır. Son altı ayda ölkə iqtisadiyyatı 6,2 faiz, qeyri-neft iqtisadiyyatı 9,6 faiz, sənaye sahəsində ümumi sənaye istehsalı 2,1 faiz, qeyri-neft sənaye sahəsində 11,5 faiz artıb. Nəticədə əhalinin gəlirlərində təxminən 20 faiz artım qeydə alınıb”, - deyə deputat qeyd edib.

Müşavirədə dövlətimizin başçısının ölkəmizin artan enerji və tranzit imkanlarından, həmçinin ölkənin ərzaq təhlükəsizliyindən də bəhs etdiyini də diqqətə çatdıran Cavid Osmanov bildirib ki, Prezident İlham Əliyev ərzaq təhlükəsizliyini təmin etmək məqsədilə həm azad edilmiş torpaqlarda, həm də ölkəmizin digər yerlərində taxıl istehsalının artırılacağını bildirdi. Bu il heç vaxt istifadə olunmayan təqribən 100 min hektarda taxıl, yəni, buğda, arpa, dənli bitkilər əkiləcək ki, bu da ölkəmizin ərzaq təhlükəsizliyini gücləndirəcəkdir.