Dilqəm Şərifov: İsmayıllıda selə qarşı mübarizə tədbirləri görülür
Bakı, 23 avqust, AZƏRTAC
İsmayıllı Suvarma Sistemləri İdarəsi tərəfindən yaşayış məntəqələrinin sel sularından mühafizəsini təşkil etmək üçün bir sıra tədbirlər görülür.
AZƏRTAC xəbər verir ki, bunu Meliorasiya və Su Təsərrüfatı Açıq Səhmdar Cəmiyyətinin nümayəndəsi Dilqəm Şərifov bildirib. O qeyd edib ki, hazırda rayon ərazisindən axan əksər çaylarda məcra təmizləmə işləri aparılır. Bu il bir neçə dəfə yağan güclü yağış nəticəsində gələn sel suları xeyli daş-çınqıl gətirərək çay məcrasını doldurub. Çayın məcrasının təmizlənməsi nəticəsində yaxınlıqda olan yaşayış məntəqələri və əkin sahələri sel sularından mühafizə olunub.
Onun sözlərinə görə, bu il suvarmanı mütəşəkkil həyata keçirmək üçün İsmayıllı Suvarma Sistemləri İdarəsi tərəfindən 134 min kubmetr suvarma kanallarının lildən təmizlənməsi və 221 min kubmetr çay yatağının təmizlənməsi işləri həyata keçirilib, beton kanallarda 1.5 km cari təmir işləri görülüb. Bundan başqa 11 ədəd hidrometrik post və 10 ədəd subartezian quyuları cari təmir olunub. Su itkisinin qarşısının alınması üçün isə hər il torpaq məcralı kanallar beton üzlüyə alınır.
D.Şərifov əlavə edib ki, hazırda İsmayıllı rayonunda suvarma mövsümü uğurla aparılır. Artıq taxıl suvarılaraq biçin yekunlaşıb. Digər kənd təsərrüfatı bitkiləri, o cümlədən meyvə bağlarının suvarılması isə davam edir. Fermerlər sahələrini suvarmaq üçün suvarma suyu ilə vaxtında təmin olunduqlarını bildirirlər.
Qeyd edib ki, İsmayıllı Suvarma Sistemləri İdarəsi rayonda 9 min hektara yaxın suvarılan torpaq sahəsinə xidmət edir. Bu sahələrin suvarılması Aşıqbayramlı su anbarı, Yuxarı Şirvan kanalı, Göyçay çay, Axox çay, Cülyan çay, Talıstan çay, Əyriçay və Girdiman çay vasitəsilə həyata keçirilir.
Bölmənin digər xəbərləri
