ELM VƏ TƏHSİL
DİM-in sədri üçüncü “Yüksəliş” müsabiqəsinin qalibləri ilə görüşüb
![](/files/galleryphoto/2024/1/1200x630/17049569845412211682_1200x630.jpg)
![](/files/galleryphoto/2024/1/1200x630/17049569842198858701_1200x630.jpg)
![](/files/galleryphoto/2024/1/1200x630/17049569844517928110_1200x630.jpg)
Bakı, 11 yanvar, AZƏRTAC
Dövlət İmtahan Mərkəzinin (DİM) Direktorlar Şurasının sədri Məleykə Abbaszadə üçüncü “Yüksəliş” müsabiqəsinin mentorluq proqramı çərçivəsində müsabiqə qalibləri Şamxal Cəmilzadə və Səkinə Vəliyeva ilə tanışlıq görüşü keçirib. Görüşdə DİM-in Direktorlar Şurası sədrinin müşaviri Məhəbbət Əkbərli və Mətbuatla iş və elektron kommunikasiya şöbəsinin müdiri Xanlar Xanlarzadə də iştirak ediblər.
Bu barədə AZƏRTAC-a DİM-dən bildirilib. Mentor Məleykə Abbaszadə qalibləri təbrik edib və mentorluq proqramını yüksək səviyyədə həyata keçirmələri üçün DİM tərəfindən iştirakçılara lazımi şərait yaradılacağını bildirib. O, rəhbərlik etdiyi təşkilat və onun inkişaf planları barəsində danışıb, mentilərin inkişaf perspektivləri haqqında tövsiyələrini verib, mentorluq proqramı çərçivəsində mentilərlə əməkdaşlıq edəcəyini, öz təcrübə və biliklərini bölüşəcəyini və gələcək idarəçi rəhbərlər kimi potensiallarının daha da inkişaf etdirilməsi üçün kömək göstərəcəyini bildirib.
Görüşdə DİM-in müxtəlif müsabiqələr zamanı iştirakçıların bilik və kompetensiyalarının ölçülməsində rolu, dünya təcrübəsində mövcud tendensiyalar və eyni zamanda, onların Azərbaycanda tətbiqi zamanı yarana biləcək çətinliklər və real imkanlar barədə söhbət aparılıb.
Qaliblərlə onların cari il üçün fərdi inkişaf planları da müzakirə edilib və gələcək görüşlərin ilkin qrafiki müəyyən edilib.
Üçüncü “Yüksəliş” müsabiqəsinin qalibləri M.Abbaszadəyə səmimi qəbula görə təşəkkür edərək, onun şəxsi təcrübəsindən və rəhbərlik səriştəsindən faydalanmaq istədiklərini bildiriblər.
Daha sonra qaliblər Mərkəzin struktur bölmələrinin rəhbərlərinin iştirakı ilə “Dövlət qulluğuna qəbulda səriştə modelinin tətbiqi üzrə layihə”nin təqdimatına və müzakirəsinə həsr olunmuş tədbirdə iştirak ediblər.
Görüşdən sonra qonaqlar DİM-də yaradılmış və ölkəmizin milli qiymətləndirmə sisteminin tarixinə aid muzeylə tanış olublar.
Xatırladaq ki, Dövlət İmtahan Mərkəzinin Direktorlar Şurasının sədri Məleykə Abbaszadə “Yüksəliş” müsabiqəsinin Təşkilat Komitəsinin üzvüdür. Bundan əlavə, müsabiqə zamanı istifadə olunan müəyyən qiymətləndirmə alətləri DİM tərəfindən hazırlanır.
Xatırladaq ki, “Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqənin məqsədi intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etməkdir.
“Yüksəliş” müsabiqəsinin qalibini bir il ərzində idarəçi rəhbərlərdən - böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı, kadr ehtiyatı bankına daxiledilmə və 20 min manat dəyərində pul mükafatı gözləyir.
Növbəti, sayca dördüncü “Yüksəliş” müsabiqəsinin keçirilməsi ilə bağlı Prezident İlham Əliyev tərəfindən 2023-cü il dekabrın 25-də Sərəncam imzalanıb.