Dövlət Turizm Agentliyinin tabeliyindəki bir neçə turizm müəssisəsinə giriş pulsuz olacaq
Bakı, 19 may, AZƏRTAC
Dövlət Turizm Agentliyi (DTA) xüsusi karantin rejimi ilə əlaqədar tətbiq edilən bəzi məhdudiyyətlərin aradan qaldırılması, Ramazan bayramı, Respublika Günü və Uşaqların Beynəlxalq Müdafiəsi Günü münasibətilə daxili turizmin inkişafına dəstək məqsədilə mayın 19-dan iyunun 2-dək tabeliyində olan bir neçə turizm müəssisəsinə girişi ödənişsiz edəcək.
DTA-nın mətbuat xidmətindən AZƏRTAC-a bildirilib ki, ziyarətçilər aşağıda adları qeyd olunan turizm obyektlərinə sosial məsafə və sanitar-epidemioloji qaydalara əməl etmək şərtilə ödənişsiz daxil ola bilərlər:
“Yanar dağ” Dövlət Tarix-Mədəniyyət və Təbiət Qoruğu;
“Atəşgah məbədi” Dövlət Tarix-Memarlıq Qoruğu;
“Lahıc” Tarix-Diyarşünaslıq Muzeyi;
Şəki Tarix-Diyarşünaslıq Muzeyi;
Şəki Xalq Tətbiqi Sənəti Muzeyi.
Xatırladaq ki, Nazirlər Kabineti yanında Operativ Qərargahın müvafiq qərarı rəhbər tutularaq mayın 18-dən etibarən Dövlət Turizm Agentliyinin tabeliyində olan turizm nümayiş obyektləri, o cümlədən qalereya və muzeylərə tətbiq olunmuş giriş məhdudiyyəti aradan qaldırılıb.
Bölmənin digər xəbərləri
