Dubayda Azərbaycanın turizm potensialı daha geniş təbliğ olunacaqdır
Bakı, 30 iyun (AZƏRTAC). Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin sədri Samir İmanov Dubayın Turizm və Ticarət Marketinqi Nazirliyinin rəhbərliyi ilə görüşmüşdür.
Cəmiyyətdən AZƏRTAC-a bildirmişlər ki, görüşün məqsədi Azərbaycanın getdikcə artan turizm potensialı barədə qarşı tərəfi məlumatlandırmaq, Dubayda bu sahəyə rəhbərlik edən orqanın ölkəmizə diqqətini cəlb etmək olmuşdur.
Cəmiyyətin sədri bildirmişdir ki, Prezident İlham Əliyev 2011-ci ilin Azərbaycanda “Turizm ili” elan olunması barədə Sərəncam imzalamışdır. Bu il iyunun 17-də Azərbaycanda yay turizm mövsümünün rəsmi açılışı olduğunu diqqətə çatdıran Samir İmanov bildirmişdir ki, cari ilin ilk 5 ayında ölkəmizə turist axını xeyli artmışdır.
Samir İmanov bu axını son illərdə Azərbaycanda digər sahələrdə olduğu kimi, turizm sektorunda da böyük uğurlar əldə edilməsi ilə əlaqələndirmişdir.
Bildirmişdir ki, ilin bütün fəsillərində Azərbaycanda istirahət etmək qonaqlara böyük zövq verir. Həmçinin Avropa ilə müqayisədə ölkəmizdə qiymətlərin daha münasib olması Azərbaycana maraq göstərən xarici turistlərin sayının getdikcə artmasına şərait yaradır. Cəmiyyətin rəhbəri ölkəmizdə turizm sektorunun daha da inkişafı məqsədi ilə paytaxt Bakıda dünyanın ən məşhur mehmanxanalarından olan 6 yeni 5 ulduzlu otelin tikildiyini diqqətə çatdırmışdır.
S.İmanov Azərbaycanın “Eurovision-2011” mahnı yarışmasının qalibi olması və gələn il bu möhtəşəm müsabiqəyə ev sahibliyi edəcəyi barədə məlumat vermişdir. Qeyd etmişdir ki, 2012-ci ilin mayında Bakıda keçiriləcək “Eurovision” mahnı yarışması zamanı Azərbaycana 60 minə yaxın turistin gələcəyi gözlənilir. Azərbaycan hökuməti bu məqsədlə ölkənin turizm imkanlarını daha da inkişaf etdirmək, xidmətin səviyyəsini yüksəltmək və Bakının simasını daha da gözəlləşdirmək uçun mühüm işlər görür.
Cəmiyyətin sədri ölkəmizdə qış turizminin inkişafına da xüsusi diqqət yetirildiyini bildirmişdir. Eyni zamanda o, nazirliyin rəhbərliyinə Naxçıvan, Gəncə, Qəbələ, Zaqatala, Şəki, Lənkəran və digər qədim tarixə malik səhərlərimiz və turizm məskənlərimiz barədə geniş məlumat vermişdir. S.İmanov Dubay rəsmilərinin diqqətini ölkəmizin işğal altında olan ərazilərinə yönəldərək vurğulamışdır ki, Ermənistanın zəbt etdiyi Dağlıq Qarabağ və onun ətrafındakı ərazilər Azərbaycanın ən səfalı və görməli yerlərindəndir. Artıq 19 ildir erməni işğalı altında olan Şuşa əzəli Azərbaycan torpağıdır və tarix boyu ölkəmizin dilbər guşəsi sayılmışdır. Hələ sovet dönəmində Şuşaya minlərlə turist axışırdı. Lakin təəssuf ki, bu gün qəsbkar ermənilər işğal etdikləri Şuşanı bütün dünyaya erməni torpağı kimi tanıtmağa çalışırlar. Erməni işğalçıları Azərbaycanın əsrarəngiz guşələrindən olan Kəlbəcərin də təkrarolunmaz turizm potensialına, şəfalı bulaqlarına yiyələnmişlər. O bildirmişdir ki, Azərbaycan dövləti tezliklə öz torpaqlarını düşmən tapdağından xilas edəcəkdir.
Görüşdə nazirliyin rəhbərliyinə Azərbaycanın turizm imkanlarını əks etdirən çoxlu kitab, brosür, CD, milli muğamlarımızdan ibarət disklər, ulu öndər Heydər Əliyevin həyat və fəaliyyətindən bəhs edən ingilis və ərəb dillərində kitablar və Heydər Əliyev Fondunun nəşr etdirdiyi “Qarabağ həqiqətləri” toplusu hədiyyə edilmişdir. Nazirliyin rəhbərliyinə habelə Azərbaycanın bayrağı, xəritəsi və üzərində Azərbaycanın rəmzləri olan xalça da təqdim olunmuşdur.
Azərbaycan haqqında dolğun məlumata görə minnətdarlıqlarını bildirən nazirliyin rəsmiləri bu əyani vasitələri Dubayda fəaliyyət göstərən iri turizm şirkətlərinə paylayacaqlarını, Azərbaycanın təbliğ olunmasının onlara tövsiyə ediləcəyini vurğulamışlar. Onlar özləri də Azərbaycana məmnuniyyətlə səfər edəcəklərini bildirmişlər.
######
Bölmənin digər xəbərləri
