Bakı, 1 may, AZƏRTAC

Yəqin ki, Dubaya gedən hər kəs aviadaşımaların əlverişli qiymətinə görə Azərbaycanda populyar olan “flydubai” aviaşirkətinin xidmətlərindən heç olmasa bir dəfə istifadə edib. Çoxları “flydubai” aviaşirkətini loukost seqmenti hesab edərək, onda “biznes-sinfin” olmasını təsəvvürlərinə belə gətirmirlər. Lakin bu xidmət var və biz onun üstünlükləri ilə tanış olaraq təəssüratlarımızı sizinlə bölüşmək qərarına gəldik.

“Ekonom-sinif”dən fərqli cəhətlər özünü artıq aeroportda göstərməyə başladı - qeydiyyat masası və gözləmə zalında ödənişsiz “İsveç stolu”. Gəlin hamısını bir-bir danışaq!

Müştərilərə fərdi yanaşma

Kifayət qədər gənc olan “flydubai” şirkəti 2008-ci ildə Dubay hökuməti tərəfindən yaradılıb, münasib qiymətlərinə və yüksək səviyyəli xidmətlərinə görə sərnişinlər tərəfindən dərhal bəyənilib. Bu gün beynəlxalq aviadaşımalar bazarını Dubayın milli aviadaşıyıcısı olmadan təsəvvürə gətirmək mümkün deyil. Onun uçuş coğrafiyası Dubaydan tranzitlə dünyanın 48 ölkəsində 95-dən çox istiqaməti əhatə edir. Təkcə 2017-ci ildə “flydubai” aviaşirkəti tərəfindən 10,9 milyon sərnişin daşınıb. Onun aviaparkındakı 60-dan çox yeni “Boeing 737” təyyarəsi MDB, Yaxın Şərq, Asiya, Afrika, Mərkəzi və Cənub-Şərqi Avropanın, demək olar, bütün ölkələrinə uçur.

2013-cü ildən aviaşirkət öz uçuş reyslərinə “biznes-sinif” xidmətini daxil edib. Yeni layihə çərçivəsində şirkətin premium xidmətlərini seçən sərnişinlərlə xidmət üzrə ayrıca şöbə açılıb. Hər gün fasiləsiz işləyən komanda xidmətin keyfiyyətinə və fərdiliyinə zəmanət verir.

Fərdi xidmət “flydubai” aviaşirkətinin “biznes-sinfinin” devizi və əsas xarakteristikasıdır. “Biznes-sinif” salonunda ənənəvi olaraq “ekonom sinif”dən daha az kreslo yerləşir, çünki 12 sərnişindən hər biri ayrıca diqqətə layiqdir.

Özünüzü evinizdə olduğu kimi hiss edin!

Dubay Beynəlxalq Aeroportunda bizim Dubay-Bakı reysinə qeydiyyatdan keçməyimiz qeyri-adi dərəcədə tez başa gəldi. Aeroportda “biznes-sinif” sərnişinlərinə xidmət üçün ayrıca masanın olması biletlərin rəsmiləşdirilməsini, baqaj, “ekonom-sinif”dən yüksək olan yük norması qəbulunu olduqca sürətləndirir. Məsələn, “biznes-sinfin” hər sərnişini əlində hər biri 15 kiloqramlıq iki çanta götürə bilər, təyyarənin yük bölməsinin baqajına ümumilikdə 40 kiloqram yük verə bilər.

Minik talonunu götürdükdən sonra “biznes-sinif” sərnişinləri üçün nəzərdə tutulan ayrıca ikimərtəbəli “lounge” zonasına getdik. Aeroportun ikinci terminalında “Duty Free” ilə yanaşı yerləşən bu rahat məkanda vaxtın necə keçdiyini hiss etmədik: pulsuz bufet, rahat stollar, yumşaq kreslolar, qəzet-jurnalların müxtəlif dillərdə yeni nömrələri, Wi-Fi, televizorlar...

“flydubai”ın biznes-zalından ayrıca danışmaq lazımdır. Ona istənilən restoran qibtə edə bilər. Siz burada çoxsaylı soyuq yeməkləri - salatlar, buterbrodlar, souslar; habelə isti şorbalar, ət və dəniz məhsullarından ləzzətli xörəklər, cürbəcür meyvə və geniş çeşiddə desertlər tapa bilərsiniz. Müxtəlif şirələr, sərinləşdirici içkilər və limonadlar, elit çaylar, habelə kapuçino və latte makiato hazırlayan qəhvə aparatı sizin xidmətinizdədir.

Nəhayət, reysimizə minik başlandığı elan edildi və biz “biznes-sinif” sərnişinləri üçün nəzərdə tutulan ayrıca çıxışa tərəf getdik. Burada qəlyanaltılar və içkilər görsək də, onlara fikir vermədik, çünki bizi təyyarədə bundan heç də az olmayan bol nemətlər gözləyirdi...

Çörək və tamaşa

Beləliklə, təyyarəyə minik başa çatdı, rahat yerləşin - siz “flydubai” şirkətinin “biznes-sinfində” uçursunuz. Əvvəlcə stüardessaların sizə gətirdiyi şirələrin dadına baxın, üzünüzü və əllərinizi ətirli salfetlərlə silin. Bizi təəccübləndirən o oldu ki, hər birimizə adbaad müraciət etdilər - siz buna “ekonom-sinif” xidmətində rast gələ bilməzsiniz.

Burada olduqca rahat, dəri üzlüklü, oturacağının eni 21 santimetr, maili söykənəcəyinin hündürlüyü 42 santimetr və ayaq üçün siyirmə altlığı olan erqonomik kreslo tam dincəlməyə kömək edir. Hər kreslonun qarşısında yüksək dəqiqliyə malik 12,1 düymlük sensor ekran yerləşir. Yeri gəlmişkən, “flydubai” öz təyyarələrinin salonunda kresloları HD displeyi ilə təchiz edən ilk aviaşirkətlərdən biridir.

Ekranın menyusunda aviaşirkətin üç rəsmi dilində - ərəb, ingilis və rus dillərində yüzlərlə film, televiziya şousu, musiqi albomları və kompüter oyunları seçmək olar. Bundan başqa, əyləncə sistemi 45 qəzetə 7 dildə rəqəmsal keçidi təmin edir.

Çoxfunksiyalı displeyin, həmçinin “mağaza” funksiyasından istifadə etmək olar: ekranda sizə təklif edilənlərdən xoşunuza gələni seçirsiniz və onu sizə dərhal gətirirlər. Seçiminizlə yaxından tanış olduqdan və almaq qərarına gəldikdən sonra yerindəcə nağd və ya bank kartı ilə hesablaş bilərsiniz.

Uçuş zamanı vaxtı keçirmək üçün yeməkdən yaxşı şey yoxdur. Uçuşun günün hansı vaxtına düşməsindən və nə qədər davam etməsindən asılı olaraq “flydubai”ın “biznes-sinif” salonunda sizə səhər yeməyi, lanç və ya şam yeməyi təklif edilə bilər. Biz gündüz uçurduq və nahar üçün təklif edilən kompleks yeməklərdən birini seçdik. Bir neçə dəqiqə keçdikdən sonra alman kartof salatı, sitrus yağında qızardılmış balıq, habelə üstünə bal çəkilmiş toyuq gətirdilər. Desert üçün biz piroq götürdük. Hamısı əsl restoranda olduğu kimi idi. Maraqlıdır ki, burada çəngəl-bıçaq “ekonom-sinifdə” olduğu kimi plastik deyil, metaldandır.

Bir sözlə, qidalar o dərəcədə əla, başlıcası ilə faydalı və dadlıdır ki, uçuş vaxtının necə keçməsindən xəbər tutmursan.

“Azərbaycan - bizim üçün mühüm bazardır!”

Son bir neçə ildə “flydubai” şirkətinin Bakıdan uçan reyslərinin tezliyi artıb, indi gündə üç reys uçur. Bundan başqa, keçən il “flydubai” ilk dəfə olaraq yay dövründə Qəbələdən Dubaya birbaşa reys açdı. Məlum olduğu kimi, Azərbaycan ərəb ölkələrindən olan turistlər arasında məşhurdur, buna görə də 2018-ci ildə şirkət Qəbələ reyslərini bərpa edəcək.

“2009-cu ildən bəri biz Bakıya Dubaydan birbaşa reyslə uçuruq. Bu il isə Qəbələyə yay mövsümü reyslərinin ikinci ili olacaq”, - deyə “flydubai”ın kommersiya əməliyyatları üzrə böyük vitse-prezidenti Ceyhun Əfəndi qeyd edib. Azərbaycan bizim üçün mühüm bazardır. Bakı işgüzar turizm üçün yaxşı infrastruktur, otellər, dadlı halal yeməklər, mənzərəli dəniz sahili təklif edir. Bütün bunlar “flydubai”ın müxtəlif istiqamətlərdən olan turistləri arasında layiqincə qiymətləndirilir”.

Aviaşirkət daim təkmilləşir və tezliklə özünün onsuz da aktual olan aviaparkını yeniləmək fikrindədir. 2013-cü və 2017-ci illərdə Dubayda keçirilən aviaşouda “flydubai” “Boeing” şirkəti ilə daha böyük tutumlu, ən yeni “Boeing 737 MAX 8” modellərinin göndərilməsi barədə saziş imzalayıb. Keçən il “flydubai” aviaparkı, nəhayət, ilk yeni təyyarələrlə tamamlandı. Bu müqavilələr çərçivəsində yaxın on il ərzində şirkətin xidmətinə 295 yeni model “Boeing” daxil olacaq. İlk növbədə uzaq məsafələrə uçan təyyarələr dəyişdiriləcək, sonra isə bütün aviapark, o cümlədən Azərbaycana uçan təyyarələr yenilənəcək. Maralıdır ki, yeni təyyarələrdə eksklüziv layihələndirmə tətbiq edilir, məsələn, “biznes-sinif” salonunda əsl çarpayıya çevrilən daha rahat kreslolar yerləşdirilir.

Son vaxtlar şirkətin uçuşlarının coğrafiyasına müxtəlif qitələr üzrə onlarla yeni istiqamətlər əlavə olunub. Onların sırasında Kinşasa (Konqonun paytaxtı, Afrika), Krakov (Polşa), Dubrovnik (Xorvatiya), Saloniki (Yunanıstan), Kataniya (İtaliya), Akaba (İordaniya) və digər yerləri qeyd etmək olar.

Həmçinin “flydubai” Dubayın digər aviaşirkəti olan “Emirates” ilə geniş tərəfdaşlıq qurub. Bu saziş çərçivəsində “Codeshare” uçuşları həyata keçirilir. Bu, aviaşirkətlərə birgə reys tərəfdaşları ilə marşrut şəbəkəsini genişləndirmək imkanı verir, nəticədə sərnişinlər dünyanın yüzlərlə istiqamətinə Dubaydan rahat tranzit olmaqla daha böyük seçim əldə edirlər.

Nəhayət, bu il 10 illiyini qeyd edən “flydubai” aviaşirkətinin bortbələdçisi formasının dizaynı dəyişdirilib: indi o, daha ciddi və klassikdir, sahənin peşəkarları arasında haqlı olaraq etiraf edilən və çoxsaylı sərnişinlərinin sevgisini qazanan aviaşirkətin mükəmməlliyinə işarədir.

Emil Eyyubov