Dünya gücləri Azərbaycanın yaratdığı reallıqları qəbul edirlər ŞƏRH
Bakı, 9 aprel, AZƏRTAC
Bu gün Azərbaycanın harada yaşamasından asılı olmayaraq hər bir azərbaycanlını qürurlandıran uğurlarından, söz sahibliyindən, qalib ölkə olaraq diktə edən tərəf olmasından bəhs edirik. Bütün bu uğurların təməlində düşünülmüş və gələcəyə hesablanmış siyasət dayanır. Müasir müstəqil Azərbaycan dövlətinin qurucusu, Ulu Öndər Heydər Əliyevin yaratdığı möhkəm təməl üzərində onun layiqli davamçısı Prezident İlham Əliyev son 20 ildən artıq dövrdə ölkəmizi zirvələrə ucaldır. Artıq bu arzumuz, amalımız gerçəkdir - İşğal altında olan torpaqlarımız azad olunub, ərazi bütövlüyümüz və suverenliyimiz tam bərpa edilib, dünya gücləri Azərbaycanla hesablaşır və yaratdığı reallıqları qəbul edirlər. Aprelin 5-də Brüsseldə keçirilən ABŞ, Avropa İttifaqı və Ermənistan arasında üçtərəfli görüş bir sıra məqamlara işıq saldı. Görüşdən öncə bu tədbirin təşkilatçıları olan ABŞ Dövlət katibi Antoni Blinkenin və Avropa Komissiyasının Prezidenti Ursula Fon der Lyayenin Prezident İlham Əliyevə telefon zəngləri, məsələyə aydınlıq gətirmələri dövlətimizin başçısının nüfuzunun, söz sahibliyinin nümayişi oldu.
AZƏRTAC xəbər verir ki, bu fikirləri Milli Məclisin deputatı Malik Həsənov bildirib.
O qeyd edib ki, tarixi Zəfəri ilə yeni reallıqlar yaradan Azərbaycanın ədalətə və beynəlxalq hüquqa söykənən siyasətinə dəstək özünü aydın şəkildə göstərir: “Prezident İlham Əliyev bu görüşün Cənubi Qafqazda sülhə, əməkdaşlığa deyil, nəticə etibarilə gərginliyin yaranmasına gətirib çıxaracağını bildirdi. Görüşdən yaranan qənaət budur ki, Ermənistan üçün təhlükəsizlik modeli Azərbaycanın təklif etdiyi sülh modeli idi. Bu təhlükəsizliyin Qərbdə axtarılması Ermənistan üçün böyük problemlər yaradacaq. Qərbin Cənubi Qafqazda status-kvonu dəyişmək planının müzakirə olunduğu bu görüş region dövlətləri tərəfindən narazılıqla qarşılandı. Prezident İlham Əliyevin Türkiyənin sabiq xarici işlər naziri, Türkiyə Böyük Millət Məclisinin millət vəkili və NATO Parlament Assambleyasındakı nümayəndə heyətinin rəhbəri Mövlud Çavuşoğlu ilə görüşündə də bu məsələ geniş müzakirə edildi. Dövlətimizin başçısı Azərbaycan-Türkiyə birliyinin daha da güclənməsinin önəmini qeyd edərək vurğuladı ki, hazırda dünyada, o cümlədən Cənubi Qafqazda proseslər çox təhlükəli istiqamətdə gedir və bununla bağlı Azərbaycan haqlı olaraq öz narahatlığını ifadə edir. Belə ki, Cənubi Qafqaz üçün cızılan plan gələcəkdə böyük fəlakətə gətirə bilər”.
Deputat vurğulayıb ki, Azərbaycanın xarici siyasət uğurları, bu əsasda Türk dünyasının birliyinə xidmət edən addımları beynəlxalq səviyyədə təqdir olunur: “Prezident İlham Əliyevin fevralın 7-də keçirilən prezident seçkilərində inamlı qələbəsindən sonra andiçmə mərasimində Türk dünyasının birliyi ilə bağlı səsləndirdiyi fikirləri xüsusi qeyd etməliyik. “Bu yeni dövrdə xarici siyasət istiqamətində yeni üfüqlər açmalıyıq”, - söyləyən dövlətimizin başçısı belə bir reallığı da xüsusi vurğuladı ki, bizim ailəmiz Türk dünyasıdır. Biz özümüzü çox yaxşı hiss edirik. Türk Dövlətləri Təşkilatına üzv olan bütün ölkələrlə qardaşlıq münasibətlərimiz var və bizim siyasətimiz Türk Dövlətləri Təşkilatını gücləndirməkdir. Bu, böyük coğrafiyadır, böyük ərazidir, böyük hərbi gücdür, böyük iqtisadiyyatdır, təbii sərvətlərdir, nəqliyyat yollarıdır, gənc əhalidir, artan əhalidir və bir soydan, kökdən olan xalqlardır. Bundan güclü birlik ola bilərmi? Əlbəttə ki, yox. Biz müştərək səylərlə elə etməliyik ki, Türk Dövlətləri Təşkilatı qlobal arenada önəmli aktora və güc mərkəzinə çevrilsin. Buna biz ancaq birlikdə nail ola bilərik”.
Azərbaycanın Türk dünyasının birliyinə yönələn addımlarının davamlılığı ilə diqqət çəkdiyini deyən M.Həsənov əlavə edib ki, Prezident İlham Əliyevin Türk Dövlətləri Təşkilatının beynəlxalq nüfuzunun artması istiqamətində atdığı addımların xronologiyasına diqqət yetirmək kifayətdir. Azərbaycan hər zaman bu birliyin qorunmasında, daha da möhkəmləndirilməsində maraqlıdır.
İki dost, qardaş ölkənin möhkəm təmələ söykənən əlaqələrindən və onların fonunda bu gün qazandıqları uğurlardan, daim biri-birinin yanında olmaqla dünyaya əsl qardaşlıq nümunəsini təqdim etmələrindən, tarixi Zəfərimizdən sonra bu dostluğun, qardaşlığın müttəfiqlik səviyyəsinə yüksəlməsindən bəhs edən deputat Azərbaycan-Türkiyə birliyinin, həmrəyliyinin regionda sabitliyin, təhlükəsizliyin qarantı olduğunu xüsusi vurğulayıb. O, Prezident İlham Əliyevin rəhbərliyi ilə Azərbaycanın uğurlarından, Türk dünyasının birliyindən, dünyaya ünvanladığı sülh, təhlükəsizlik, əməkdaşlıq çağırışlarından danışarkən bu reallıqların təməlinin məhz Ümummilli Lider Heydər Əliyevin 2003-cü ildə xalqa tarixi müraciəti ilə qoyulduğunu bildirib: “Həmin ildə keçirilən prezident seçkilərində xalqın böyük əksəriyyətinin səsini qazanaraq Prezident seçilən İlham Əliyev Heydər Əliyev siyasətinə sadiqliyini atdığı addımları, Azərbaycanı ən yüksək zirvələrə qaldırması ilə təsdiqləyir. Bu günümüzün reallıqları 2018-ci il aprelin 11-də keçirilən prezident seçkilərində İlham Əliyevin qələbəsindən sonra andiçmə mərasimində səsləndirdiyi hədəfləri yada salmağa çağırış edir. Dövlətimizin başçısı belə bir əminliyi ifadə etmişdi ki, istədiyimizə nail olacağıq. Qarabağ münaqişəsi yalnız və yalnız ölkəmizin ərazi bütövlüyü çərçivəsində öz həllini tapmalıdır. Bunun başqa yolu yoxdur. Azərbaycan heç vaxt imkan verməz ki, ərazimizdə ikinci qondarma erməni dövləti yaradılsın. Prezident İlham Əliyev bu seçkilərdən altı ilə yaxın dövr keçdikdən sonra böyük əminliklə bu reallığı qeyd etdi ki, bütün vədlər yerinə yetirildi. 2018-2024-cü illərin uğurları yeni dövrün başlanğıcı kimi dəyərləndirilən 7 fevral növbədənkənar prezident seçkilərinin keçirilməsini şərtləndirdi. İlham Əliyevin inamlı qələbəsi ilə Azərbaycan yeni reallıqların fonunda uğurlarının davamlığını təmin edir. Bir daha sübut olunur ki, ölkəmizin sözü imzası qədər dəyərlidir. Dövlətimizin başçısının qeyd etdiyi kimi, güclü Azərbaycan həmişə hədəfimiz olub. Əgər güclü Azərbaycan qurmasaydıq, əgər kimdənsə istər siyasi, istər iqtisadi sahədə asılı olmuş olsaydıq, heç vaxt biz ərazi bütövlüyümüzü bərpa edə bilməzdik”.
Bölmənin digər xəbərləri
