Ədalətin seçici olmadığı bir dünya – Prezident İlham Əliyevin BMT-də tarixi çıxışı
Bakı, 26 sentyabr, AZƏRTAC
Dünya siyasətinin ən yüksək tribunası – BMT Baş Assambleyası bu günlərdə bir daha Azərbaycanın səsini eşitdi. Prezident İlham Əliyevin 80-ci sessiyada etdiyi çıxış yalnız ölkəmizin deyil, bütövlükdə beynəlxalq aləmin diqqətini çəkdi. Bu çıxışda səslənən fikirlər sadəcə diplomatik bəyanatlar deyildi, gələcək nizamın siyasi manifesti idi.
Bu fikirləri AZƏRTAC-a açıqlamasında Milli Məclisin deputatı filologiya elmləri doktoru Elnarə Akimova söyləyib. O bildirib ki, Prezidentin “Gəlin birlikdə ədalətin seçici olmadığı bir dünya quraq” çağırışı, şübhəsiz ki, ən çox sitat gətirilən mesaj oldu. Bu, həm beynəlxalq münasibətlərdə ikili standartların tənqidi idi, həm də Azərbaycan diplomatiyasının gələcək istiqamətini göstərən strateji yanaşma. Prezident İlham Əliyev açıq şəkildə bildirdi ki, ədalət anlayışı güclülərə sərf edən mexanizmə çevrilməməlidir.
Azərbaycan lideri nitqində ölkəmizin son illərdə qazandığı qələbəni də beynəlxalq ictimaiyyətə xatırlatdı: “Biz həm müharibədə, həm də sülhdə qalib gəldik”. Bu sözlərdə təkcə hərbi zəfərin qüruru deyil, həm də regionda sülh quruculuğu prosesində Azərbaycanın lider mövqeyi əks olunur. Qələbənin davamı olaraq işğaldan azad olunmuş torpaqlarda aparılan bərpa və reinteqrasiya işləri ölkəmizin strateji baxışının nümunəsidir.
“Çıxışın ən diqqətçəkən məqamlarından biri Ermənistanla danışıqlar barədə deyilənlər idi. Prezident vurğuladı ki, proseslər yalnız ikitərəfli formatda aparıldığı üçün real nəticə verib və artıq sülh müqaviləsi layihəsi beş əsas prinsip əsasında formalaşıb. Bu, Azərbaycanın müstəqil və suveren iradəsinin göstəricisidir: heç bir vasitəçiliyə ehtiyac olmadan regionun taleyini müəyyən etmək.
Eyni zamanda, Prezident İlham Əliyev beynəlxalq münasibətlərin yeni xəttini ortaya qoydu. ABŞ ilə əlaqələrin strateji müstəviyə keçdiyini bəyan edən dövlətimizin başçısı Strateji İşçi Qrupunun yaradılacağını və tərəfdaşlığın Xartiya ilə rəsmiləşəcəyini bildirdi. Bu addım Azərbaycanın Qərblə münasibətlərini dərinləşdirməklə yanaşı, ölkəmizi beynəlxalq siyasətdə etibarlı tərəfdaş kimi daha da möhkəmləndirəcək”, - deyə müsahibimiz əlavə edib.
Deputat vurğulayıb ki, Azərbaycan lideri, həmçinin regional bağlantı və enerji diplomatiyasını çıxışının ön sırasına gətirdi. Bu, təsadüfi deyil. Çünki ölkəmiz bu gün nəinki regionun, hətta Avrasiyanın enerji təhlükəsizliyində əsas oyunçulardan biridir. Bakı-Tbilisi-Ceyhan kəmərindən Xəzər dənizindəki alternativ enerji layihələrinə qədər bütün strateji xətt Azərbaycanın dayanıqlı inkişaf və beynəlxalq əməkdaşlıq missiyasını əks etdirir.
Azərbaycan Prezidentinin BMT tribunasındakı çıxışı həm ritorik gücü, həm də siyasi məzmunu ilə seçildi. O, bir tərəfdən ölkəsinin gücünü nümayiş etdirdi, digər tərəfdən isə ədalətə və beynəlxalq hüquqa sədaqəti ön plana çəkdi. Bu, diplomatiyanın ən düzgün tarazlığı idi – həm mövqeyini diktə etmək, həm də qlobal dəyərlərə sadiq qalmaq.
Siyasi müşahidəçilərin haqlı olaraq bu çıxışı Azərbaycanın gələcək onilliklər üçün siyasi yol xəritəsi adlandırdıqlarını diqqətə çatdıran E.Akimova deyib ki, burada sülhün qurulması, strateji tərəfdaşlıqların inkişafı, enerji və kommunikasiya xətlərində mərkəz rolunun möhkəmləndirilməsi aydın şəkildə görünür. Lakin qarşıda duran vəzifələr az deyil: sülh müqaviləsinin tam reallaşdırılması, ABŞ ilə yeni mərhələnin konkret nəticələr verməsi, enerji siyasətində diversifikasiyanın davam etdirilməsi həlledici olacaq.
“Amma bir həqiqət danılmazdır: Azərbaycan BMT tribunasından yalnız öz sözünü demədi, həm də gələcək qlobal nizamın ədalət prinsiplərinə əsaslanması üçün çağırış etdi. Prezident İlham Əliyevin çıxışı beynəlxalq aləmdə rezonans doğurmaqla yanaşı, ölkəmizin dövlətçilik iradəsini və siyasi sabitliyə bağlılığını da nümayiş etdirdi. Bu, sadəcə bir nitq deyildi – Azərbaycanın dünya siyasətində artan rolunun təsdiqi idi”, - deyə E.Akimova fikrini yekunlaşdırıb.
Bölmənin digər xəbərləri
