Ə.Əmirov adına NQÇİ-də bioremediasiya layihəsi başa çatdırılmışdır
Bakı, 6 iyul (AZƏRTAC). ARDNŞ-in Ə.Əmirov adına NQÇİ-nin 2-ci mədən ərazisində 5 hektar sahədə neft qalıqlarının bioremediasiya üsulu ilə təmizlənməsi işləri “Ekol Mühəndislik Xidmətləri” Qapalı Səhmdar Cəmiyyəti (QSC) tərəfindən başa çatdırılmışdır.
AZƏRTAC xəbər verir ki, müvafiq normalara uyğun olaraq yerinə yetirilmiş işlər “Azneft” İstehsalat Birliyinə təhvil verilmişdir. ARDNŞ-in Ekologiya İdarəsinin əməkdaşlarının iştirakı ilə keçirilmiş təhvil-təslim zamanı əraziyə vizual baxış keçirilmiş, təmizlənmiş sahənin coğrafi koordinatları müəyyənləşdirilmiş, aparılmış işlərin texnoloji tələblərə uyğunluğunu dəqiqləşdirmək üçün ərazidəki 5 nöqtədə iki qatdan 0,2-0,4 metr dərinlikdə qrunt nümunələri götürülmüş və Ekologiya İdarəsinin kompleks tədqiqatlar laboratoriyasında təhlil olunmuşdur.
Aparılmış analizlərin nəticələrinə əsasən, aşkara çıxarılmışdır ki, bioremediasiya aparılmamışdan öncə ərazidə çirklənmiş torpağın tərkibində neft məhsullarının miqdarı 8-10 faiz, bioremediasiya işlərindən sonra isə 0,15-0,79 faiz olmuşdur. ARDNŞ neftlə çirklənmiş ərazidə bioremediasiya üsulunun tətbiqi Azərbaycan Respublikasının Ekologiya və Təbii Sərvətlər Nazirliyi ilə razılaşdırılmış texnologiyanın tələbinə uyğun həyata keçirilmişdir.
Bölmənin digər xəbərləri
