Əfqan Nifti: Azərbaycan Avropa və Mərkəzi Asiya arasında əsas qapıdır
London, 25 aprel, AZƏRTAC
Azərbaycan Avropa ilə Mərkəzi Asiya arasında əsas qapı rolunu oynayır. Trans-Xəzər bağlantısında Azərbaycanın strateji mövqeyi və kritik əhəmiyyəti xüsusi önəm daşıyır.
Bu fikirləri Xəzər Siyasət Mərkəzinin direktoru Əfqan Nifti Birləşmiş Krallığın Lordlar Palatasında “Trans-Xəzər əlaqəliliyi, enerji təhlükəsizliyi və kritik minerallar” mövzusunda keçirilən yüksəksəviyyəli tədbirdən sonra AZƏRTAC-a açıqlamasında bildirib.
Əfqan Nifti qeyd edib ki, bir neçə həftə əvvəl Səmərqənddə Avropa İttifaqı ilə Mərkəzi Asiya ölkələri arasında mühüm anlaşma imzalanıb. Onun sözlərinə görə, bu cür təşəbbüslərin uğurla həyata keçirilməsi üçün Azərbaycanın tranzit və açar ölkə kimi rolu mühüm əhəmiyyət daşıyır: “Bu platforma vasitəsilə biz həmin ölkələrlə Azərbaycanı bir araya gətirərək qərarvericilərin diqqətinə çatdırmaq istəyirik ki, regionda aparılacaq layihələrdə Azərbaycanla möhkəm münasibətlərin qurulması vacibdir”.
O, həmçinin nadir metallar və nadir elementlərlə bağlı Britaniya, Avropa İttifaqı və ABŞ-ın yüksək səviyyədə marağının olduğunu diqqətə çatdırıb. Əfqan Nifti bildirib ki, bu potensialın gerçəkləşməsi üçün Azərbaycanın Orta Dəhlizdəki rolu xüsusi önəm kəsb edir.
“Bu resursların çoxu Mərkəzi Asiyada yerləşsə də, onların qlobal bazara çatdırılması üçün Azərbaycanla əməkdaşlıq həyati əhəmiyyət daşıyır”, – deyə Xəzər Siyasət Mərkəzinin rəhbəri əlavə edib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
