“Ekol Mühəndislik Xidmətləri” QSC-də beynəlxalq standartlar üzrə daxili audit keçirilir
Bakı, 5 may (AZƏRTAC). Azərbaycan Respublikası Dövlət Neft Şirkətinin (ARDNŞ) “Ekol Mühəndislik Xidmətləri” Qapalı Səhmdar Cəmiyyətində (QSC) TS EN İSO 9001 keyfiyyətin idarəetmə sisteminin, TS EN İSO 14001 ekologiya idarəetmə sisteminin və TS İSO 18001 OHSAS əməyin mühafizəsi və təhlükəsizliyi idarəetmə sisteminin müvafiq maddələrinin tələblərinə uyğunluğunun müəyyən edilməsi məqsədilə aprelin 1-dən başlayaraq müəssisənin struktur bölmələrində daxili audit keçirilir.
QSC-dən AZƏRTAC-a bildirmişlər ki, idarəetmə sisteminin mövcud qanunvericiliyinə, daxili qaydalara və idarəetmə prinsiplərinə, keyfiyyət, ekologiya, təhlükəsizlik norma və qaydalarına uyğunluğunun və səmərəliliyinin müstəqil yoxlama sistemi olan daxili audit, İMPr/03 nömrəli “Daxili audit” prosedurasının tələblərinə əsasən həyata keçirilir.
Qrafikə əsasən, audit QSC-nin bütün struktur bölmələrini əhatə etmişdir. Auditin keçirilməsinə ekoloji monitorinq departamentinin nümayəndələri ilə yanaşı, QSC-də müvafiq sertifikatları və təcrübələri olan auditorlar cəlb edilmişlər. Audit zamanı müvafiq sənədləşmələr aparılır və aşkar edilmiş uyğunsuzluqların aradan qaldırılması üçün uyğun proseduralar tövsiyə edilir.
Daxili audit qrafik əsasında QSC-nin bütün struktur bölmələri əhatə edilməklə mayın 15-dək davam edəcəkdir. Sonda hər bir bölmə üzrə auditin yekun hesabatı hazırlanaraq QSC-nin rəhbərliyinə təqdim olunacaqdır.
Bölmənin digər xəbərləri
