Ekoloji problemlərin həlli dayanıqlı inkişafın əsas şərtlərindən biridir
Bakı, 29 avqust, AZƏRTAC
Azərbaycanda həyata keçirilən ekoloji cəhətdən dayanıqlı sosial-iqtisadi inkişaf strategiyasında ətraf mühitin mühafizəsi və sağlamlaşdırılması, təbii ehtiyatların rasional istifadəsi və bərpası, ekoloji təhlükəsizliyin təmin olunması əsas hədəf kimi müəyyənləşdirilib. Son illər həmin istiqamətdə həyata keçirilən ekoloji layihələr də bunu aydın göstərir. Lakin təəssüf ki, bəzən ekologiyaya ziyan vuran hallara da rast gəlinir.
AZƏRTAC xəbər verir ki, ölkəmizdə iqtisadiyyatın ən vacib sahələrindən biri olan tikinti sektorunun inkişafına xüsusi əhəmiyyət verilir. Tikinti materiallarının əksəriyyəti yerli istehsal hesabına ödənilir. Lakin bəzi hallarda istehsal prosesi ekoloji tələblərə cavab vermir. Karxanaların fəaliyyəti zamanı ekoloji tələblər pozulduğunda ətraf mühitə ciddi ziyan dəyir. Torpağın münbit qatı dağıdılır, çayların təbii axarı məhv edilir. Nəticədə bu vəziyyət ekoloji tarazlığa və insan sağlamlığına mənfi təsir göstərir.
Ekologiya və təbii sərvətlər nazirinin müavini Novruz Quliyev nazirlik əməkdaşlarının ətraf mühitin mühafizəsinə, karxanaların fəaliyyətinə nəzarət etmək, onların ətraf mühitə vurduğu ziyanı müəyyənləşdirmək məqsədilə mütəmadi olaraq monitorinqlərin aparıldığını deyib: “Yoxlamalar zamanı qanunazidd fəaliyyət aşkar olunarsa, maarifləndirmə, təbliğat yolu ilə nizamlamağa çalışırıq. Əgər yenidən ekoloji qanunvericiliyin tələbləri pozularsa, o zaman inzibati cəza metodlarını tətbiq etməyə məcbur oluruq”.
Digər bir məsələ atmosferin ozon qatının dağılması, iqlimin getdikcə istiləşməsi, səhralaşma prosesinin getdikcə daha geniş əraziləri əhatə etməsi, ətraf mühitin çirklənməsi ilə əlaqədar olan qlobal ekoloji problemlərdir. Bu baxımdan avtomobillərin, kafe-restoran şəbəkələrinin havaya buraxdıqları zəhərli qaz və tullantıların qarşısının alınması üçün təxirəsalınmaz tədbirlərin həyata keçirilməsi zərurəti gündəmə gəlir.
Ekologiya və Təbii Sərvətlər Nazirliyinin departament direktoru Ramal Bağırov atmosfer havasına atılan tullantılar, zərərli qaz qarışıqları, tüstülərlə bağlı Bakı şəhəri və Abşeron yarımadasında 500-ə yaxın ictimai-iaşə obyektlərində monitorinqlər həyata keçirildiyini qeyd edib: “Monitorinqlər zamanı hava nümunələri götürülərək laborator təhlillər aparılıb. Müəyyən olunub ki, havada olan zərərli qaz qarışıqlarının miqdarı normadan dəfələrlə çoxdur. Bununla əlaqədar restoran sahiblərinə mövcud problemlərin həlli istiqamətində göstərişlər verilib. Həmin obyekt sahiblərinin standartlara cavab verən qurğular quraşdırmaları üçün sentyabrın 1-dək vaxtları var”.
Ölkədə həyata keçirilən ekoloji siyasətin əsas məqsədlərindən biri də indiki və gələcək nəsillərin ehtiyaclarının təmin edilməsidir. Bu baxımdan mövcud ekoloji sistemləri və potensialı iqtisadi baxımdan qorumaq və təbii ehtiyatlardan, xammal bazasından səmərəli istifadə etmək vacibdir.
Nazirliyin Mineral Xammal Elmi Tədqiqat İnstitutunun direktoru Mürsəl Əliyev sahibkarların xammal bazasına qənaət etməsi üçün müasir texnologiyalara ehtiyacı olduğunu vurğulayıb. Bununla həm sahibkarların iqtisadi vəziyyəti müsbətə doğru dəyişər, həm də xammal bazasından səmərəli istifadə etmək olar.
Ölkəmizdə ekoloji problemlərin həlli dayanıqlı inkişafın əsas şərtlərindən biri hesab edilir. Qarşıya qoyulan hədəfə çatmaq üçün dövlət proqramları icra edilir, kompleks tədbirlər görülür.
Bölmənin digər xəbərləri
