Ekoloji qanunvericiliyin tələblərinə əməl etməyənlər cərimələnmişlər
Bakı, 9 avqust (AZƏRTAC). Ekologiya və Təbii Sərvətlər Nazirliyinin Ətraf Mühitin Mühafizəsi Departamenti tərəfindən iyulun 15-dən 31-dək ekoloji qanunvericiliyin tələblərinə riayət olunmasını yoxlamaq məqsədi ilə araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırma zamanı su və torpaq ehtiyatlarının, atmosfer havasının, yerin təkinin, fauna və floranın mühafizəsi, o cümlədən ətraf mühitə qanunsuz məişət və istehsalat tullantılarının yerləşdirilməsi ilə əlaqədar bir sıra qanun pozuntuları aşkar edilmişdir. Yol verilmiş qanun pozuntularına görə 135 akt və protokol tərtib olunmuş, nöqsanların aradan qaldırılması üçün 54 müddətli məcburi göstəriş verilmişdir.
Ümumilikdə isə 73 min 600 manat məbləğində cərimə tətbiq olunmuş, ətraf mühitə dəymiş ziyana görə 382 min 20.27 manat məbləğində iddia qaldırılmış, ətraf mühitə tullantıların atılmasına və axıdılmasına görə hüquqi və fiziki şəxslərə 38 min 602.63 manat məbləğində ödəmə tətbiq edilmişdir. Tədbir görülməsi üçün hüquq mühafizə orqanlarına 7, məhkəməyə 1, icra qurumlarına isə 20 iş göndərilmişdir.
Bölmənin digər xəbərləri
