Ekoloji terror yoxdursa niyə ekoloji monitorinqə imkan yaradılmır? – Ekspert rəyi
Bakı, 14 yanvar, AZƏRTAC
Həmişə olduğu kimi Ermənistanda indi də insan hüquqlarının pozulması davam edir. Erməni mətbuatının məlumatına görə, ölkə parlamenti “Ermənistan” fraksiyasının 22 deputatının səlahiyyətlərinə xitam verəcək. Xatırlayırsınızsa, bir neçə gün öncə Ermənistanın Gümrü şəhərindəki Rusiyanın 102-ci hərbi bazasının qarşısında Rusiya əleyhinə keçirilən aksiyada da 65 aksiya iştirakçısı saxlanılıb. Bütün dünya bilir ki, bu gün Ermənistanda vəziyyət nə yerdədir. Ermənistanda sosial-iqtisadi vəziyyətin ağırlaşması fonunda müşahidə olunan proseslərdən biri də bu ölkədə insan hüquqlarının, söz və fikir azadlığının qorunması sahəsində mövcud durumun gündən-günə pisləşməsi, demokratik dəyərlərin məhv edilməsidir. Artıq Ermənistanda belə bir fikir hökm sürür ki, ölkədə demokratiya dəyərləri də iqtisadiyyatda olduğu kimi, böyük tənəzzül dövrünü yaşayır.
Bu fikirləri siyasi ekspert Vüsalə Hüseynli AZƏRTAC-a açıqlamasında ifadə edib.
O qeyd edib ki, Ermənistanda baş verənləri bizim kimi dünya ictimaiyyəti də izləyir. Ancaq çox maraqlıdır ki, “Human Rights Watch”, “Amnesty International”, “Freedom House” kimi beynəlxalq təşkilatlar, Qərb dairələri bu prosesi susqunluqla müşahidə edirlər. Təbii ki, bu da ikili standartların göstəricisidir. Bu gün Ermənistanda çox ciddi qarşıdurma var, əhali küçələrdədir və sərbəst fikrini bildirmək istəyənlərə qarşı çox ciddi şəkildə təzyiqlər, həbslər olur. İnsanlar polis tərəfindən repressiyalarla üzləşirlər.
V.Hüseynlinin sözlərinə görə Ermənistanda buna bənzər hadisələr əvvəlki dövrlərdə də müşahidə olunub. Ancaq maraqlıdır ki, Xankəndidə separatçı Arayik Arutyunyan, Ruben Vardanyan tərəfindən girov saxlanılan bir ovuc ermənidən təzyiq aləti kimi istifadə edən beynəlxalq “müdafiəçilər” Ermənistanda hüququ pozulan erməniləri görməzlikdən gələrək susurlar”.
Ekspert qeyd edib ki, Rusiyanın emissarı Ruben Vardanyan, dırnaqarası lider Arayik Arutyunyan öz biznes maraqlarını qorumaq, cinayətkar əməllərini gizlətmək üçün Rusiya sülhməramlı kontingentinin köməyi və qanunsuz silahlı dəstələrin təhdidi ilə Xankəndidə və ətraf ərazilərdə yaşayan erməniləri təzyiq altında saxlayırlar. Məhz bu şəxslər onlara tabe olan qanunsuz silahlı dəstələrin yardımı ilə ermənilərin Azərbaycanın müvafiq dövlət orqanları ilə kommunikasiyasına mane olmağa çalışırlar, onların təzyiqi və təhriki ilə, guya mülki şəxslər, əslində isə sadəcə formasını dəyişmiş qeyri-qanuni silahlı dəstə üzvləri Azərbaycanın qızıl, mis-molibden yataqlarında ekoloji monitorinq aparmasına mane olurlar. Artıq ayrı-ayrı ermənilər müxtəlif məsələlərlə bağlı Azərbaycanın dövlət orqanlarına müraciətlər edirlər. Aşkar görünür ki, Xankəndi və Rusiya sülhməramlılarının müvəqqəti yerləşdirildiyi Azərbaycan ərazilərində yaşayan ermənilər Rusiyanın emissarı Ruben Vardanyan və dırnaqarası lider Arayik Arutyunyanın maraqlarının, cinayət əməllərinin gizlədilməsi üçün girov kimi istifadə edilir. Bu məsələdə Rusiya sülhməramlı kontingenti də Azərbaycana məxsus qızıl, mis-molibden yataqlarında Azərbaycanın dövlət orqanlarının ekoloji monitorinqinə şərait yaratmamaqla bu cinayətkar əməllərin məsuliyyətini bölüşürlər. Çünki Azərbaycana məxsus qızıl, mis-molibden yataqlarında Azərbaycan dövlət orqanlarının ekoloji monitorinqi uzun illər milli sərvətlərimizin talan edildiyini, ekoloji terror faktlarını, Ruben Vardanyan - Arayik Arutyunyan cütlüyünün cinayətkar əməllərini dəlillərlə sübut etməyə imkan yaradacaq. Məhz həmin səbəbdən bu cütlük silah gücünə minlərlə ermənini girov saxlayıb.
“Adlarını çəkdiyimiz beynəlxalq hüquq-müdafiə təşkilatlarını obyektivliyi qorumaq, öz prinsiplərinə sadiq qalmaq naminə bu xüsuslara diqqət yetirməyə çağırırıq. Qoy onlar araşdırsınlar, əgər cinayətkar əməllər yoxdursa, ekoloji terror yoxdursa niyə bu cür inadkarlıqla ekoloji monitorinqə imkan yaradılmır. Hansı fundamental səbəblər ola bilər ki, adi ekoloji monitorinqin aparılması bu qədər narahatlıq yaratsın? Ruben Vardanyan və Arayik Arutyunyanın silah gücünə minlərlə ermənini girov saxlaması cinayətlərin miqyası barədə də ipucu verir. Beynəlxalq birlikləri və təşkilatları bu suallara cavab axtarmağa və Azərbaycanın beynəlxalq hüquqla qorunan haqlarına hörmətlə yanaşmağa çağırırıq. Əks halda, onlar da cinayətkarların himayəsi məsuliyyətini götürmüş olarlar”, - deyə V.Hüseynli vurğulayıb.
Bölmənin digər xəbərləri
