Əksər dağ çaylarında sululuq azalmışdır
Bakı, 23 iyul (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən iyulun 23-də çaylarda araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, Böyük Qafqazın Quba-Xaçmaz bölgəsi çaylarında sululuq ongünlük normanın 95-110, Kiçik Qafqazın çaylarında 100-130, Lənkəran-Astara bölgəsi çaylarında 80-190, Naxçıvan MR çaylarında isə 90-95 faizini təşkil etmişdir.
İyulun 21-dən başlayaraq hava şəraitinin yağmursuz və isti keçməsi ilə əlaqədar əksər dağ çaylarında sululuğun azalması müəyyən edilmişdir. Kür çayının Qıraqkəsəmən məntəqəsində suyun səviyyəsində 26, Qanıx çayının Əyriçay məntəqəsində 9 santimetr azalma qeydə alınmışdır.
Eyni hal Kür çayının aşağı axınındakı məntəqələrdə də müşahidə olunmuşdur.
Hazırda Kürün Surra məntəqəsində suyun səviyyəsi 388, Şirvanda 265, Salyanda 223, Bankədə 227, Araz çayının Novruzlu məntəqəsində isə 123 santimetrdir.
Bölmənin digər xəbərləri
