Elçin Cəfərov: Azərbaycan yüksək təşkilatçılıq qabiliyyətini dünyaya bir daha nümayiş etdirdi
Bakı, 30 may, Leyla Qurbanova, AZƏRTAC
Azərbaycan UEFA Avropa Liqasının final oyununa yüksək səviyyədə ev sahibliyi etdi. Bu nüfuzlu tədbirin uğurla keçirilməsi Azərbaycanın böyük beynəlxalq tədbirləri, o cümlədən bütün dünyanın diqqət mərkəzində olan idman yarışlarını yüksək səviyyədə təşkil etmək bacarığını bir daha sərgilədi.
Bu sözləri Azərbaycan Güləş Federasiyasının vitse-prezidenti Elçin Cəfərov AZƏRTAC-a müsahibəsində deyib.
E.Cəfərov qeyd edib ki, aidiyyəti dövlət qurumlarının səmərəli fəaliyyəti, həyata keçirilən məqsədyönlü tədbirlər, UEFA rəhbərliyinin prinsipial mövqeyi, bütün məsələlərə vaxtında müdaxilə edərək şayiələrə imkan yaratmaması bu tədbirin uğurla keçirilməsinin başlıca səbəblərindəndir. Hazırlığın yüksək səviyyəsi xaricdəki anti-Azərbaycan qüvvələrinin və onların daxildəki əlaltılarının bütün iddialarını puça çıxardı, qara piar kampaniyasının iflasa uğraması ilə nəticələndi.
“Ən mötəbər beynəlxalq qurumlar irimiqyaslı tədbirlərin ev sahibliyi hüququnun Azərbaycana verilməsi barədə qərarları məmnuniyyətlə qəbul edirlər. Bu cür qərarların qəbulunun əsas səbəbi Azərbaycanın dünyada idman dövləti, mədəniyyətlərarası dialoq məkanı kimi tanınmasıdır. Təəssüf ki, Avropada bəzi qüvvələr həmişə olduğu kimi, bu dəfə də ölkəmizə qarşı idmana aid olmayan çirkin qarayaxma kampaniyası aparmağa çalışdılar. Lakin final qarşılaşmasının yüksək səviyyədə təşkili, azarkeşlər üçün yaradılan şərait və s. amillər bütün bu əsassız iddiaların puça çıxması ilə nəticələndi”, - deyə vitse-prezident bildirib.
Digər mühüm beynəlxalq tədbirlər kimi, bu nüfuzlu idman yarışında da könüllülərin peşəkar fəaliyyətinin əhəmiyyətini vurğulayan E.Cəfərov Azərbaycanda könüllülüyün artıq bir hərəkat, institut kimi formalaşdığını, gənclərimizin hər zaman dövlətin yanında olduğunu qeyd edib. Təsadüfi deyil ki, ilk Avropanın Oyunlarının məşəli məhz Bakıda alovlandırıldı. "Odlar Yurdu" qardaşlıq ruhunda alovlanan Avropa Oyunlarının ilk məşəlinin sülh, dostluq və təntənə mesajını idman vasitəsilə bütün dünyaya yaydı. Avropa Oyunları, eləcə də digər irimiqyaslı tədbirlərdən sonra minlərlə azarkeş və turist bir müddət Bakıda qalıb ölkəmizlə yaxından tanış oldular. Sadələşdirilmiş viza rejimi, otellərdə əlverişli qiymətlər, eyni zamanda, uçuş biletlərinin münasibliyi irimiqyaslı yarışlardan sonra ölkəmizə turist axınını daha da gücləndirib.
“UEFA Avropa Liqasının final oyununun Bakıda uğurla təşkili Azərbaycan dövlətinin, hakimiyyət strukturlarının olduqca səmərəli və peşəkar fəaliyyətinin bir daha əyani təsdiqi oldu. Azərbaycan göstərdi ki, 2020-ci ildə Avropa çempionatının dörd oyununu da ən yüksək səviyyədə təşkil etmək iqtidarındadır”, - deyə E.Cəlilov xüsusi vurğulayıb.
Bölmənin digər xəbərləri
