Eldəniz Əmirov: Dayanıqlı iqtisadiyyata nail olmaq üçün yaşıl enerjinin tətbiqi böyük əhəmiyyət daşıyır
Bakı, 19 iyun, AZƏRTAC
Azərbaycanda ətraf mühitin qorunması, təbii ehtiyatların səmərəli istifadə olunması, eyni zamanda getdikcə artan tələbatlar fonunda dayanıqlı iqtisadiyyata nail olmaq üçün Azərbaycan iqtisadiyyatında yaşıl enerjinin tətbiqi istiqamətlərinin genişləndirilməsi böyük əhəmiyyət kəsb edir. Təsadüfi deyil ki, Prezident İlham Əliyev tərəfindən “Azərbaycan 2030: sosial-iqtisadi inkişafa dair Milli Prioritetlər” sənədində məhz beşinci prioritet olaraq təmiz ətraf mühit və yaşıl artım ölkəsi adlandırılıb. Bu sənəddə ekoloji cəhətdən təmiz texnologiyanın tətbiqi ilə iqtisadi inkişafın təmin olunması, tullantıların təkrar emalı, çirklənmiş ərazilərin bərpasının təşviq olunması kimi bir çox məsələlər və konkret tapşırıqlar öz əksini tapıb.
Bu sözləri AZƏRTAC-a açıqlamasında iqtisadçı-ekspert Eldəniz Əmirov söyləyib.
Ekspert qeyd edib ki, təkrar emal prosesi yaşıl iqtisadiyyatın inkişafına, eyni zamanda rəqabətqabiliyyətli sənaye məhsulunun istehsalına hədəflənib. Bu prosesin özündə təkrar emal anlayışı geniş yer tutur və iqtisadiyyatda artıq trend kimi meydana gəlib: “Yaşıl enerji ətraf mühitə zərər vermədən istifadə edilir. Buraya külək enerjisi, hidroenerji, günəş enerjisi, biokütlələrdən əldə olunan alternativ enerjilər daxildir. Tullantıların emalı nəticəsində istifadə olunan, həyata keçirilən prosesləri də bura aid etmək olar. Bu qəbildən hələ bir neçə il bundan əvvəl Bakıda bərk məişət tullantılarının yandırılması zavodu fəaliyyətə başlayıb. Həmin istiqamətdə azad olunmuş ərazilərimizdə yaşıl iqtisadiyyat potensialı ilə bağlı konkret strategiya müəyyənləşib. Qurumlar arasında, o cümlədən xarici şirkətlərlə müəyyən anlaşma memorandumu imzalanıb. Səudiyyə Ərəbistanı, həmçinin Birləşmiş Ərəb Əmirliklərinin şirkətləri ilə böyük müqavilələr imzalanıb. Bu müqavilələrə əsasən Xızıda külək elektrik stansiyası, Qaradağda günəş elektrik stansiyasının yaradılması ilə bağlı layihələrə artıq başlanılıb. BP şirkəti ilə işğaldan azad olunmuş Cəbrayıl rayonu ərazisində günəş elektrik stansiyasının yaradılması ilə bağlı razılıq əldə olunub. “Ağıllı şəhər, “Ağıllı kənd” konsepsiyasının icrası sahəsində də yenə yaşıl iqtisadiyyatın ciddi elementlərini müşahidə edirik”.
Ekspert, həmçinin Kiçik və Orta Biznesin İnkişafı Agentliyində startap şəhadətnamələrinin verildiyini və qrant müsabiqəsində seçilmiş layihələrə qrantlar təqdim olunduğunu bildirib. Bu zaman motivlərin daha da stimullaşdırılması üçün yaşıl iqtisadiyyata yönələn fəaliyyəti olan sahibkarlara həm startapların verilməsi, həm də qrantların verilməsi həyata keçirilir. Bu da yaşıl iqtisadiyyatyönlü fəaliyyəti dəstəkləyən bir mexanizmdir.
E.Əmirov vurğulayıb ki, prioritet olaraq ölkəmizdə 200 qiqavata yaxın yaşıl enerji potensialı, alternativ enerji potensialı var. Bu enerji potensialının gerçəkləşməsi nəticəsində ölkə yalnız ixraca köklənməyib, eyni zamanda ölkədə iqtisadi aktivliyin təmin olunmasında məhz bu resursların rolu getdikcə artacaq.
Bu, 2022-2026-cı illəri əhatə edən strateji inkişaf proqramında, eləcə də Naxçıvanın 2023-2027-ci illəri əhatə edən inkişaf proqramında var. Bir çox dövlət sənədlərində bu məsələ təsbit olunub.
Bölmənin digər xəbərləri
